Абай әлеміне саяхат
Абай облысы бойынша меншікті тілші
Семей теміржолында Абайдың 180 жылдық мерейтой- ына орай танымдық және тағылымдық мәні зор іс-шаралар көптеп өткізілуде. Абай мұражайына экскурсия, ақын өлеңдерін мәнерлеп жатқа оқудан челлендж жыл басынан бері жалғасын тауып келеді.
Ал ТЧЭ-24 – Семей локомотив пайдалану депосының теміржолшылары ақын мерейтойына даярлық аясында тағы бір тамаша іс-шараны қолға алды. Мекеме басшылары немесе кадр бөлімі басшылығы кез келген жұмыс кабинетіне кіріп Абайдың өмірі мен шығармашылығына байланысты тосыннан сауал қояды. Тез әрі нақты жауап берген теміржолшы жеңімпаз атанады.
Бұл ретте тепловоз машинисі Елзат Тлекин барлық сауалдарға дұрыс жауап беріп, эрудициялық білімімен баршаны таңғалдырды. Айта кету керек, машинисті көрген адам тура 50-55 жастар шамасындағы хакім Абайды көргендей әсерде болады. Сырт келбеті ұлы ақынды еске түсіретін машинист шын мәнінде Абайдың аталас туысы болып келеді екен. Туған нағашы атасы Бекзат Үсенбайұлы Жидебай жеріндегі Абай мұражайында ұзақ жылдар қызмет етіпті. Ал өз атасы, заманында Абаймен үзеңгілес жүрген туысы Тілеке Орынбайұлы кезінде заңғар жазушы Мұхтар Әуезовке «Абай жолы» роман-эпопеясын жазуда көп көмектесіп, хакім өмірі жайлы деректермен бөліскен жан.
Басынан «Абай тақия» аталатын ұлттық бас киімді тастамайтын машинист жуырда әріптестерімен Семейдегі ақын мұражайына барып, локомотившілерге үлкен әулет шежіресін таныстырды. «Абай – тек семейліктердің ғана емес, барша қазақтың мақтанышы» дейді ол.
