Елдің ықылысы – еңбектің өтеуі
"Қазақстан теміржолшысы" газетінің Жамбыл облысындағы меншікті тілшісі
Бір есептік сайлау мерзімі бес жылды құрайды десек, Жамбыл жол бөлімшесінде кәсіподақ ұйымын жиырма жылға жуық басқарған Жұман Сәменовті теміржолшылар үш мәрте қайта сайлапты. Бұл – кәсіподақ мүшесі болып табылатын қарапайым еңбек адамының сенімі деген сөз.
Теміржолшылар кәсіподағы ұйымының Жамбыл филиалына 19 жыл төрағалық еткен Жұман Сәменовті құрметті еңбек демалысына шығарып салған салтанатты жиында әріптестері осыны айтты. Сала кәсіподағы төрағасының орынбасары Ғафу Несіпбаев, «Астана» филиалының төрағасы Серік Сәрсекеев, Орталық тексеру комиссиясының төрағасы Нұржан Асқарбаев, тағы басқа азаматтар арнайы келіп, кәсіподақ ардагеріне жылы лебіздерін білдіріп, құрмет көрсетті.
– Көпшіліктің шынайы құрмет-ықыласынан асқан баға жоқ. Көпшіліктің бүгінгі ықылыс-құрметі әріптесіміздің кәсіподақ ұйымына сіңірген еңбегінің өтеуі екені талас тудырмайды. Ендігі тілек – бейнеттің зейнетін көріңіз, – деген Ғафу Оразұлы Жұман Тұрғынбайұлының иығына шапан жапты.
Жиында Жамбыл ЖТ бөлімшесінің директоры Айдын Сеитбенбетов пен Жамбыл магистральдық желі бөлімшесінің директоры Мейрамбек Кенжебаев жамбылдық теміржолшылардың ізет-тілегін жеткізіп, Құттықтау хат тапсырып, сый-сияпат көрсетті.
– Станция бастығы болып тұрғанымызда мекемеге керектіні бір айтып, ұжымдағы еңбек қауіпсіздігі мәселесін екі айтып, алдыңызға талай келдік. Сол мәселелердің бәрінің уақытылы шешілуіне ықпал етіп, кәсіподақ тарапынан қолдан келген көмекті жасауға ұмтылып, кез келген теміржолшының тілегін тыңдап, өтінішін аяқсыз қалдырмайтын ұстанымыңыз кейінгі кәсіподақ қызметкерлеріне үлгі болсын, – деді Айдын Пайзылдаұлы.
Жамбыл облысы, бұрынғы Луговой станциясында дүниеге келіп, теміржол жағалап өскен Жұман Сәменов Омбы теміржол көлігі инженерлері институтын «Теміржол көлігіндегі автоматика, телемеханика және байланыс» мамандығы бойынша бітіріп, Жамбыл теміржолында отыз бес жылдай жемісті еңбек етті.
Жамбыл белгі беру және байланыс дистанциясының электромеханигі болып бастап, Жамбыл жол бөлімшесінің пойыз диспетчері, Жамбыл станциясы, жол қозғалысы бөлімінің, жол және құрылыс бойынша жол байланысы бөлімі бастығының орынбасары, бас экономист, Жамбыл бөлімшесі директорының орынбасары қызметтерін атқарды.
Ал кәсіподақ қызметінде әріптестері Жұман Сәменовті қызметкерлердің әлеуметтік-экономикалық құқықтарын қорғау бойынша қойылған міндеттерді шебер және сапалы шешіп отырған төраға ретінде жоғары бағалайды. Оның еңбек дәстүрін сақтаудағы адал ұстанымдары мен жұмысқа деген ішкі жауапкершілігі, кәсіподақ қызметіндегі белсенділігі ұжымда кәсіподақ қозғалысының қалыптасуына жол ашты. Ол еңбек ұжымдары арасындағы бірлікті нығайтуға және бастауыш кәсіподақ ұйымдарының дамуына елеулі үлес қосты.