Өткел кезекшісінің қырағылығы

Қырағылық керек қасиет. Әсіресе теміржол саласында аса қажет. Жамбыл магистральдық желі бөлімшесіне қарасты Түлкібас жол дистанциясының өткел кезекшісі Нұрлан Оразбаев осы қырағылығының арқасында «Қозғалыс қауіпсіздігі үшін» медалімен марапатталған.

Оқиға өткен жылдың 28 шілдесінде күндізгі сағат 10.43-те Сұрым-Боранды аралығында болды. Жүк пойызының екінші вагоны шайқалып келе жатқанын байқаған Нұрлан Айдарұлы дереу Боранды станциясының кезекшісіне хабарлайды. Пойыз тоқтатылып, вагондарды тексеру кезінде өткел кезекшісі нұсқаған вагонның серіппесі сынып, реактивті тартқыш болттардың босап кеткені анықталады. Нұсқауға сай, вагонды ағытылып, жөндеуге жіберіледі.  

– Тура сол кезде өткелдерде пойыздардың жылдамдығына шектеу қойылған болатын. Сағатына 25 шақырым жылдамдықпен өтіп бара жатқан жүк пойызының екінші вагоны шайқалып бара жатты. Сықырлаған дыбысына қарап, вагонда ақау барын бірден байқадым. Жылдамдықты арттырса, вагон құлауы мүмкін. Станция кезекшісіне хабарлап, вагондарды тексеру қажет екенін жеткіздім, – дейді өткел кезекшісі Нұрлан Оразбаев.

№5 желілік учаскесіндегі өткел Борандыдан Таразға қарай 4 шақырым жерде Қосбөлтек елді мекенінде орналасқан. Темір жол осы ауылға кіреберіс жолды кесіп өтеді.  

Өткел кезекшісінің жұмысы таңда ауысымды қабылдап алған сәттен басталады. Кезекшілікке түскен шақтан күн мен түн тас жол мен шойын жолдағы қозғалыс қауіпсіздігіне жауапты. Кей күндері шлагбаумды ашып-жабумен қатар, асыққан жүргізушілерге темір жолдың қауіпті аймақ екенін айтып, түсіндіру жұмыстарын жүргізуге де тура келеді екен.

Нұрлан Оразбаев Қосбөлтек ауылында туып-өскенін айтады. Балалық шағы осы маңда өткен. Әкесі Айдар 35 жыл жол бригадирі болып еңбек етіпті.

 – 2013 жылы өткел ашылатынын естіген соң, Түлкібасқа барып, өткел кезекшісі болып жұмысқа орналасуға өтініш білдірдім. Әкем марқұмның табаны тиген, маңдайының тері сіңген жерде еңбек еткім келді. Содан алдымен бір жыл 7 ай тәжірибеден өту үшін жолшы болып жұмыс істедім. Теміржол бойында өсіп, әкеме еріп жүріп, жол жұмысын біліп өскенмен, іс жүзінде бәрі басқаша екен. Көп нәрсені үйрендім, білім-біліктілігімді арттырдым. 2015 жылы осы өткелге кезекшілікке ауыстым. Теміржол нақтылықты, үлкен жауапкершілікті қажет ететін сала ғой. Өз ісіңді біліп, жұмысты адал атқарсаң, жемісін көресің. Қауіптің алдын алғаным үшін медальмен марапатталдым, сыйақы да берілді, – дейді Нұрлан Айдарұлы.

Жалпы теміржол саласында әрбір маман қауіп-қатердің алдын алу үшін өз міндетін адал атқарумен қатар, талап пен тапсырманы орындауда тиянақты болуы тиіс. Жауапкершілік қозғалыс қауіпсіздігін қамтамасыз етіп қана қоймайды, көптеген материалдық шығындардан сақтайды.