Сән-салтанат та, марапат та қарапайым еңбек иелеріне арналды
"Қазақстан теміржолшысы" газетінің Жамбыл облысындағы меншікті тілшісі
Тамыздың алғашқы жексенбісінде атап өтілетін кәсіби мерекені биылдан бастап «Теміржолшылар күні» деп меншіктеп алған сала мамандары бұл күні құрмет пен қошеметке бөленді. «Жұмысшы мамандықтар жылына» орай қарапайым адал еңбек иелеріне биыл екі есе көңіл бөлініп, мерейлері асып жатты. Тараз қаласындағы теміржолшылар саябағы атанып кеткен «Түрксібте» ақшаңқан киіз үйлер тігіліп, ақ дастархан жайылды. Сән-салтанат та осында, қошемет пен марапат та осында.
Мерекелік жиында «Қазақстан теміржолы - Жүк тасымалы» ЖШС «ЖТ Жамбыл бөлімшесі» филиалының директоры Айдын Сеитбенбетов теміржолшыларды кәсіби мерекелерімен құттықтап, ізгі тілегін жеткізді. «Жұмысшы мамандықтар жылында» қарапайым еңбек иелерінің мәртебесін көтеруге мән беріліп жатқанын, бұл өз кезегінде жастардың жұмысшы мамандықтарға, оның ішінде теміржол саласына келуіне ықпал ететінін айтып өтті.
Салтанатты шараға облыс әкімінің орынбасары Қанатбек Мәдібек арнайы келіп қатысып, адал еңбегімен өңірдің дамуына үлес қосып келе жатқан сала мамандарына «Облысқа сіңірген еңбегі үшін» медалін тапсырды. Сондай-ақ Жамбыл облысы әкімінің Құрмет граматолары және Алғыс хаттарымен марапаттады.
Қанатбек Мәдібек өз сөзінде теміржолшылардың еліміздің көлік-логистикалық әлеуетін дамытуға зор үлес қосып отырғанын айта келіп, биыл Жамбыл өңірінде 5 бірдей вокзалдың күрделі жөндеуден өтетінін тілге тиек етті. «Соның ішінде Тұрар Рысқұловтай тұлғаның маңдайының тері сіңген Түрксіб пен Адамзаттың Айтматовы атанған жазушының табаны тиген Боранды станциясының қайта жаңғыртылуы үлкен қуаныш», - деді облыс әкімінің орынбасары.
«Құрметті теміржолшы», ІІІ дәрежелі «Теміржол даңқы» медальдары, «Адал еңбегі үшін», «Үздік жас маман», «Үздік вагоншы», «Үздік энергетик» сынды жоғары кәсіби біліктілігі үшін берілетін төсбелгілерді және «Қазақстан теміржолы» ҰК АҚ Басқарма Төрағасының Құрмет грамоталары мен Алғыс хаттарын «Қазақстан теміржолы - Жүк тасымалы» ЖШС «ЖТ Жамбыл бөлімшесі» филиалының директоры Айдын Сеитбенбетов, «Жамбыл магистральдық желі бөлімшесі» филиалының директоры Мейрамбек Кенжебаев, Жамбыл жол бөлімшесінің қауіпсіздік бойынша бас ревизоры Медет Қолдасов, Теміржолшылар кәсіподағы Жамбыл филиалының төрағасы Ерболат Жидебаев тапсырды.
Сонымен қатар, «Жамбыл магистральдық желі бөлімшесі» филиалының директоры Мейрамбек Кенжебаев, Жамбыл жол бөлімшесінің қауіпсіздік бойынша бас ревизоры Медет Қолдасовқа «Үздік еңбек адамы» төсбелгісі табыс етілді.
Биыл теміржолшылар кәсіподағы ұйымының құрылғанына 120 жыл толып отыр. Айтулы датаға орай кәсіподақ ұйымы теміржолшыларды «Теміржолшылар кәсіподағына – 120 жыл» төсбелгісімен марапатталды. «ЖТ Жамбыл бөлімшесі» және «Жамбыл магистральдық желі бөлімшесі» филиалы директорларының Құрмет грамоталары мен Алғыс хаттары тапсырылған сала мамандарының қатары биыл былтырғыдан да көп болды.
Теміржолшылар күнінде саланың ардагерлері де ұмыт қалған жоқ. Ардагерлер кеңесінің төрағасы Бауыржан Найманбаев тоқсан жастан асқан Абдуалы Данаев бастаған қарияларды мерекелік шараға арнайы шақырды. Төрге оздырып, құрмет көрсетілді.
Салтанатты іс-шара соңын концерттік бағдарламаға ұласып, киіз үйлерде теміржолшыларға арнап мерекелік дастархан жайылды.