Арыста қос мереке қатар тойланды
Түркістан облысы бойынша меншікті тілші
Арыста теміржолшылардың кәсіби мерекесі мен қала күні қатар тойланып, жұртшылық айтулы күнді сән-салтанатпен атап өтті. Мерекеге құрметті қонақтар мен қала тұрғындары және теміржолшылар қауымы қатысты. Сөйтіп, орталық Әл-Фараби алаңы думанды кешке айналды.
Бүгінде Арыс қаласында 45 мыңға жуық тұрғын бар болса, оның 5 мыңнан астамы ел экономикасының күретамыры саналатын теміржол саласында еңбек етеді. Қалада осы саланың дамуына өлшеусіз үлес қосып келе жатқан жүздеген кәсіпорын қызмет көрсетеді. Сондықтан да бұл бағытта ғасырдан астам тарихы бар Арыс қаласы ресми түрде – Орта Азия қақпасы атанған. Ал ел аузында теміржолшылар қаласы делінеді.
Осылайша, қос мереке қатар келген шара аясында қала әкімі Қайсар Маңқараев тұрғындарға ізгі тілегін білдіріп, елдің әлеуметтік-экономикалық дамуына ерекше үлес қосқан азаматтарға түрлі марапаттар табыс етті. Бұл ретте ондаған теміржолшыға құрмет-қошемет көрсетілгенін айрықша атап өткен лазым. Сол сияқты Арыс қаласының қоғамдық жұмыстарына белсенді қатысып, жоғары жетістіктерге жеткен азаматтарға да алғыс хаттар табысталды. Өз ісінің үздік маманы атанған бірқатар азаматтар «Арыс қаласының дамуына қосқан үлесі үшін» медалімен марапатталды.
Айта кетейік, мерекеге орай ұйымдастырылған концерттік бағдарлама аясында Түркістан облысының мәслихат депутаты Ержан Қосмамбетов мен Арыс қалалық мәслихатының төрағасы Қайрат Ахметов теміржолшыларды төл мерекесімен құттықтап, ақ тілектерін жолдады. Арыс аспанын әнге бөлеген мереке аясында елімізге танымал өнер жұлдыздары жиналған қауымға ерекше көңіл-күй сыйлады.
