Ең арзан пойыз – оңтүстікте

Қазақстандағы ең арзан пойыз оңтүстікте. 6937 және 6938 нөмірмен белгіленген қала маңында қатынайтын пойыз Түркістан мен Шымкент арасын жалғайды. Бас-аяғы 188 шақырымға созылатын жолмен жүріп өту құны бар-жоғы – 573 теңге.

Түркістан облысы әкімдігінің ұсынысымен «Жолаушылар тасымалы» АҚ «Қала маңы тасымалы» филиалы жетекшілерінің тапсырмасын іске асырушы Шымкент аймақтық телімі болып табылады. Телім басшысы Бұрхан Ғалымжанның айтуынша, талапқа сай жабдықталған пойыз мейлінше жолаушылар көңілінен шығатындай деңгейде жасалған. Аптасына 5 рет жолға шығатын пойыз қазірше 1 ғана заманауи вагоннан құралған. Атап айтқанда, ауа баптағыш пен қауіпсіздік қағидалары қатаң сақталған вагон бейнебақылау камерасы мен электронды дабыл қағу жүйесімен қамтамасыз етілген. Сондай-ақ алғашқы медициналық жедел жәрдем көрсету мүмкіндіктері де назардан тыс қалмаған.

– Қазіргі кезде екінің бірінің қолында ұялы телефон жүретіндіктен оны қуаттандыру көздерінің болуы ең басты қажеттіліктің бірі екені рас. Сондықтан да біз мұны басымдыққа алдық. Одан бөлек, пойызда жолаушы таңдауына қарай ыстық шәй мен кофе беріліп, жолшыбай тамақтанып алуға да мүмкіндіктер қарастырлыған, – дейді Ғалымжан Сүлейменұлы.

Заманауи жабдықталған вагон биодәретханамен жабдықталған. Оған қоса, қажет болса мүмкіндігі шектеулі азаматтардың еркін кіріп-шығуы үшін арнайы қоларба да ұсынылады. Әзірше жергілікті халықтың қажетін толық қанағаттандырып тұр.  

Жалпы, екі аралықта сейсенбі, сәрсенбі, жұма, сенбі, жексенбі күндері қатынайтын пойыз Түркістан қаласынан 15:28-де аттанып, 20:12-де Шымкентке жетсе, таңғы 06:55-те Шымкенттен шығып, 11:18-де Түркістан вокзалына жетеді. Бас-аяғы 188 шақырымға созылатын жолды жүріп өту құны – 573 теңгені құрайды. Ал пойыз аялдайтын үлкенді-кішілі бекеттер мен разъездердің саны – 19. Әрине, ара қашықтыққа байланысты олардың билет құны да түрлі болып келеді. Мәселен, Шымкенттен Бадамға дейінгі баға 121 теңге болса, Арыс-2 станциясына дейін 241 теңге, ал Қарақоңырға 332 және Темір станциясына дейін 422 теңгемен жетіп алуға болады. Жолақы төлеуде балалар мен мүмкіндігі шектеулі жандарға арналған 50 пайыздық жеңілдік қарастырылған. Билеттер bilet.railways.kz, kaspi.kz, aviata.kz, freedom Travel сайттары мен Қазпошта желілерінде қолжетімді.

Пойыз жолсеріктерінің түсіндіруінше, ата-ананың бірімен 7 жасқа дейінгі бір бала тегін жүрсе, ата-ананың екеуі де мінген жағдайда 2 бала тегін жүруге құқылы. Ал қоғамдық көлікте 15-18 жастағы балалардың өзі еркімен жүріп-тұруы қолданыстағы заңнамаға сәйкес нотариалды сенімхат талап етіледі.

Мұнда айрықша атап өтетін жаңашылдықтың бірі – жолаушылар вагонында балалар бұрышының жасақталуы. Өйткені шамамен 4,5 сағатқа созылатын сапарда балалардың жолдағы уақытты қызықты әрі есте қаларлықтай етіп өткізу үшін барынша қолайлы жағдай жасалған. Танымдық тұрғыда көркем безендірілген бұрышта түрлі ойыншықтардың қауіпсіздігі басты назарға алынған.