Маңғыстау теміржол өткелдерінде биыл бірде-бір жол апаты тіркелмеді

Маңғыстау жол дистанциясына қарасты 34 теміржол өткелі болса, соның бәрін бақылауда ұстап отыру әрине оңай емес. Десе де, дистанциялықтардың үздіксіз жүргізіп келе жатқан профилактикалық жұмыстардың нәтижесінде биыл өткелде бірде-бір жол-көлік оқиғасы тіркелмеген.  

Өткен жеті айда өткелдерде профилактикалық түсінік жұмыстары жеті рет ұйымдастырылған. Нәтижесінде бірнеше мың автокөлік жүргізушісіне теміржол өткелінің қауіпті аймақ екені мен одан өтерде сақтық ережелерін қатаң қадағалауы ескертілген. Ақпараттық парақтар таратылған.  

– Теміржол өткеліне байланысты профилактикалық бағыттағы жұмыстарымыз өткелге жақын орналасқан елдімекендерде де ұйымдастырылуда. «Назар аудар, өткел!» айлығы жарияланғанда  бұл тұрғыдағы іс-шараларымыз арта түседі. Одан бөлек, өткел кезекшілеріне қатысты да өз жоспарларымыз бар. Оларға әр айда жоспарлы және жоспардан тыс техникалық сабақтар жүргіземіз. Мамыр мен маусым айы аралығындағы айлық барысында локомотив депосының машинистерімен де кездесіп, техникалық сабақ өткіздік. Өткелге келген тұста жол-көлік оқиғасының болмауы олардың да қырағылығына байланысты, жағдай автокөлік жүргізушілеріне қатысты болса да машинистеріміз жағдайды алдын ала байқап, келеңсіз оқиғаның алдын алуға дайын болуы керек, – деген Маңғыстау жол дистанциясының жетекші жол инженері Мұхтар Кульчанбаев жүргізушілер көліктерін уақытылы техникалық байқаудан өткізіп, тексертіп тұру керектігін айтады.  

Себебі жақында бір оқиға тіркелген, екінші шақырымдағы өткелде «Лада» маркалы көліктің рөлі сынып кетіп, өткелдің «Б» бағытындағы екі бағыттауыш бағананы соғып барып тоқтаған. Әрине, көлік иесіне хаттама толтырылып, жергілікті жол полициясы шара қолданған, теміржол мүлкіне зақым келгені тағы бар. Бұл оқиғаның салдары бұдан да жаман болуы мүмкіндігін ескерсек, автокөлік иелері өз көлігінің техникалық жағдайына бейжай қарамай, уақытылы тексертіп тұруды  және өткелде жүру ережесін қатаң сақтауы қажет.