Абай өлеңдерін оқыды
"Қазақстан теміржолшысы" газетінің Жамбыл облысындағы меншікті тілшісі
Тараз көліктегі оқу орталығы кәсіподақ ұйымының төрайымы Гүлжан Ақназарованың ұйымдастыруымен Абай өлеңдерінің апталығы өтті.
Хакім Абайдың 180 жылдығына арналған әдеби-сазды көпшілік іс-шараны өткізуге орталық оқытушыларымен бірге тыңдаушылары да атсалысты.
Апталық аясында Тараз вокзалында ұлттық киім киген тыңдаушылар жолаушыларға жапсырмасына Абай Құнанбайұлының өлең жолдары жазылған түрлі тәттілерді таратты. Тәтті алғандар – шағын викториналық ойынның қатысушылары саналады. Шарт бойынша олар ақын өлеңін әрі қарай жалғастырып оқуы тиіс.
– Ұзақ жолға шыққандар үшін бұл ойын қызықты болды. Жолаушылардың ішінде Абай өлеңін білмейтіндері жоқтың қасы. Осының өзі ұлы ақынның шығармалары өміршең екенін көрсетеді, – дейді Гүлжан Ақназарова.
Абай апталығы Тараз көліктегі оқу орталығында өткен әдеби-сазды кеште қорытындыланды. Тыңдаушылар іс-шарада ақынның өлеңдерін оқып, әндерін шырқады. Хакімнің қара сөздерінен шағын сахналау жасап, көрініс көрсеткендер де болды. Тіпті осы кешке арнап видеоролик түсіргендері де бар.
Абай мұрасын насихаттауға үлес қосып, іс-шараға белсенді қатысқан Шу машиналандырылған жол дистанциясының мамандары Нұржан Оспан, Ерлан Әкімбаев, ШЧ-33 Алматы белгі беру және байланыс дистанциясы Қазыбек би станциясынан келген тыңдаушы Мейіржан Серік, Ағадыр машиналандырылған жол дистанциясының қызметкері Дастан Шәкенов, ВЧД-27 Жамбыл вагон пайдалану депосы, Тараз станциясының вагон қараушысы Самат Омаровты Тараз көліктегі оқу орталығының директоры Лашынкүл Күзербаева арнайы алғыс хаттармен марапаттады.