Әулиеата командасы бас жүлдені жеңіп алды
"Қазақстан теміржолшысы" газетінің Жамбыл облысындағы меншікті тілшісі
«ҚТЖ-Жүк тасымалы» ЖШС «Жамбыл ЖТ бөлімшесі» филиалының директоры Айдын Сеитбенбетов «Мемлекеттік тіл – достық тірегі» атты теміржолшылар арасында өткен республикалық конкурста филиал намысын абыроймен қорғап, бас жүлдені жеңіп оралған «Әулиеата» командасын қабылдады.
Тілге құрмет – елге құрмет екенін атап өткен Айдын Пайзылдаұлы өз міндеттерін адал атқарып жүрген теміржолшылардың саланың ғана емес, мемлекеттік тілдің дамуына үлес қосып жүргені үшін филиал басшылығы атынан Алғыс хаттармен марапаттады. Сондай-ақ филиалдың кәсіподақ ұйымы жеңімпаздарға сый-сияпат тапсырды.
Мемлекеттік тіл саясатын насихаттау, ұлттық татулықты нығайту және этнос өкілдерінің қазақ тілін үйренуге деген қызығушылығын арттыру мақсатында ұйымдастырылатын байқауға «Жамбыл ЖТ бөлімшесі» филиалы «Әулиеата» командасын жасақтап, жарысқа қосқан болатын. Үш кезеңнен тұратын конкурс талаптарын орындап, «Сөз маржанын» терген жамбылдықтар қарсыластарынан озық шығып, жоғары ұпай жинады.
– Талап бойынша топ құрамында жетекшісі қазақ, ал қалған бес қатысушы түрлі этностардың өкілдері болуы тиіс. Мемлекеттік тілді еркін меңгерген Жамбыл локомотив пайдалану депосының екі машинисі Владимир Пономаренко, Ибрахим Юсупов, Жамбыл вагон пайдалану депосының вагон қараушылары Мавлюдбек Бурсалов пен Евгений Дворецкий, бөлімшеден Константин Лыгарев – шетінен өнерлі әрі ойлары ұшқыр жастар. Конкурстың үш кезеңіндегі талаптарды орындауда бәрінен озық шықты, – дейді «Әулиеата» командасының жетекшісі, «Жамбыл ЖТ бөлімшесі» филиалының коммерциялық ревизоры Медет Ұшақбаев.