Семей ЖТ бөлімшесінде күзгі комиссиялық бақылау басталды
Абай облысы бойынша меншікті тілші
Шығыстағы Семей ЖТ бөлімшесінде қыркүйектің 17-нен бастап күзгі комиссиялық бақылау кезеңі басталды. Биылғы сын жылдағыдан өзгерек, желі бойындағы барлық мекемелерге, станциялар қызметкерлеріне қойылар талап жоғары, тексеру шаралары да қатаң.
Филиал директоры Алмас Сейсемқанов төрағалық ететін, арнайы құрылған комисия құрамында шаруашылық ревизорларымен бірге барлық депо жетекшілері, түрлі бөлімдер мен еншілес мекемелердің басшылары да бар.
Биылғы бақылау іс-шаралары тораптық жүк станциясы Дегелеңнен бастау алды. Оның өзіндік себебі де бар. Қарқын ала бастаған көмір тасымалы процесін жүргізуде бірінші сыныпты бұл станцияның үлесі зор.
Сол тәрізді вагондарды сұрыптау мен жүк пойыздарын құрастыруда басты орын алатын Жаңа-Семей станциясын да әуелгі кезекте сүзгіден өткізу, алдағы қысқы маусымға барынша жылдам дайындау – аса маңызды міндет саналады. Бұл орайда ПЧ-40 мекемесінің иелігіндегі АС-5-18 көлігіне мінген комиссия мүшелері екі станция аралығындағы 142 шақырым желі бойындағы барлық станциялар мен жол айрықтарын толықтай тексеріп шықты.
Жаз бойғы жауынды ауа райына қарамастан бұл өңірдегі теміржолшылар елеулі жұмыс жасаған. Ескірген шпалдар мен қумажолдардағы бағыттама бұрмаларын, жол шаруашылығына қарасты насос станцияларымен пневмобуткаларды қысқы мерзімге әзірлеуде, ауыстыруда елеулі іс бар екен. Ал, одан кейінгі кезекте сыныптан тыс Семей станциясы мен оған іргелес ПЧ-39, ЭЧ-18, ШЧ-29, ТЧЭ-24, ВЧД-23 мекемелері назарға алынды. Жоспарға сай, яғни, алдын ала белгіленген кесте бойынша кейінгі кезекте Ақтоғай-Аягөз, Аягөз-Жарма, Жарма-Шар телімдерін тексеру ісі тұр.
Осы орайда қауіпсіздік департаментінің Семей учаскесі бойынша аймақтық бас ревизоры Темірбек Ақшалов бастаған РБ-6 аппараты желі бойындағы барлық шаруашылықтарға толық көлемде тексеру жұмыстарын жүргізуде. Әсіресе, нормативтік-техникалық құжаттар рәсімдеу, жылжымалы құрамдар мен арнайы құрылғыларға күтім көрсету нормаларын сақтау ісі қатаң назарға алынуда.
Комиссия мүшелері қауіпсіздік, еңбек қатынастары мен өндірістегі тәртіп бойынша бірқатар сын-ескертпелер де жасауда. Сол тәрізді бірқатар мекемелердегі орын алған олқылықтарды жоюға қосымша уақыт берілді.
Сонымен қатар, сәуір айының 5-ші жұлдызынан бері күні бүгінге дейін жүргізіліп жатқан жалпыұлттық «Таза Қазақстан» экологиялық акциясы аясындағы сенбілік жұмыстарының нәтижесі де бірінші кезекте назарға алынуда. Осынау тексерулер барысында теміржолшылардың қызметтік киімдермен жабдықталуы, еңбек қауіпсіздігі, жұмыс орнының жайлылығы да назарға алынды. Бұл ретте теміржолшылардың қыс қарсаңындағы қажеттіліктерін түгендеуде мекемелердегі салалық кәсіподақ ұйымдарының төрағалары да күш салуда.
Осы айдың 29-ы күні күзгі тексеру жұмыстары Семей-Локоть телімі аралығында жүргізіліп, Ресей аумағындағы Локоть станциясы арқылы дрезина көлігімен Өскемен өңіріне қарасты Шемонайха станциясын бетке алатын болады.
Жалпы, биылғы комиссиялық тексеру жұмыстары Өскемен өңірін қоса алғанда алдағы айдың 3-і күні толық тәмамдалмақ. Оның нәтижесінде қазан айының 8-ші жұлдызына дейін арнайы хаттама әзірленетін болады. Ал, анықталған кемшіліктер, сын-ескертпелер, шаруашылықтардың жалпы жағдайы алдағы уақытта өткізілетін тораптық жиындар барысында кеңінен талқыға түседі.