Арыс-2 вокзалы қайта салынуда

Арыс қаласындағы Арыс-2 темір жол вокзалы толықтай сүріліп, заманауи үлгіде қайта салынуда. Жолаушылар инфрақұрылымын жаңғыртуға бағытталған республикалық бағдарлама аясындағы ірі жобаның нәтижесінде қала тұрғындары мен қонақтары үшін жаңа әрі ыңғайлы вокзал пайдалануға беріледі деп жоспарланған.

Оңтүстік өлкедегі темір жолдың күретамыры саналатын Арыс станциясынан тәулік бойы жүк және жолаушылар пойызы ерсілі-қарсылы қатынап жатады. Бұл қалада Арыс-1 және Арыс-2 деп аталатын екі вокзал бар болса, оның алғашқысының іргетасы қаланғанына 120 жылдан асқан. Кезінде Орта Азияның қақпасы атанған Арыстағы жүк ағыны артып, станцияның жүктемесі күшейген сәтте сала мамандары жолаушы тасымалын оңтайлы ұйымдастыру мақсатында Арыс-2 вокзалы салынады. Енді міне, уақыт сәті келіп, осы вокзал ғимараты түпкілікті сүріліп, жаңа ғимарат қайта бой көтеруде. Тоғыз жолдың торабы саналатын бұл вокзалдан тәулігіне орта есеппен 18 пойыз аялдаса, оның екеуі халықаралық бағытта қатынайды. Ал жолаушы ағыны шамамен 300-ден асып жығылады.  

Құрылыс учаскесінің бастығы Нұрдәулет Нариманұлының айтуынша, қазіргі кезде құрылыс алаңындағы 13-15 маман еңбек етіп, арнайы техникалар жұмылдырылған. 600 шаршы метрлік 1 қабатты ғимараттың құрылысы тамыз айында басталып, бүгінде іргетасы толық құйылып бітті.

– Біздің жоспарымыз бойынша алдағы 35-40 күнде ғимарат қабырғасының кірпішін өріп, шатырын жауып үлгереміз. Одан кейін есік-терезесі мен әрлеу-сырлау жұмыстарына кірісеміз. Сәтін салса, жыл соңына жеткізбей вокзал ғимаратын толық пайдалануға береміз деп ойлаймын, – дейді нысан құрылысын жүргізуге жауапты «Kanfar Building» ЖШС-нің өкілі.  

Айта кетейік, жаңа вокзал жобасында жолаушыларға қолайлы жағдай жасауға ерекше көңіл бөлінген. Ғимараттың сәулеттік шешімі заман талабына сай орындалып, кең күту залы, абаттандырылған перрон, заманауи жарықтандыру жүйесі қарастырылған. Сонымен қатар аумағында шағын аллея салынып, демалуға арналған орындықтар орнатылады деп жоспарланған.