Қызылорда облысы бойынша меншікті тілші
Сексеуіл станциясындағы теміржол өткелінде заманауи үлгідегі нысан пайдалануға берілді. Бұл бөлімше бойынша пойыздардың қозғалыс қауіпсіздігін артыруға қосылған үлес, теміржолшының жұмыс орынын, әлеуметттік ахуалын жақсарту шараларының бірі.
Теміржол бойындағы әр өткел қозғалыс қауіпсіздігінің алтын діңгегі. Ал сол өткелде тәулік бойы кезекшілік ететін теміржолшының жауапкершілігі мен еңбегі ерекше. Бұл жолы Сексеуіл жол дистанциясы теліміндегі күзетілетін өткелде қуанышты жаңалық орын алды, өткел кезекшісіне арналған жаңа ғимарат бой көтеріп, 30 қыркүйек күні пайдалануға берілді.
Ашылу салтанатына Қызылорда магистральдық желі бөлімшесінің басшысы Ербол Саулебеков, Сексеуіл жол дистанциясының басшысы Мұрат Байділдаев, сондай-ақ Сексеуіл кенті ардагерлер одағының төрағасы Бақытжан Жолмырзаев пен зейнеткер Ықылас Мұханбеталиев қатысып, жаңа нысанның лентасын қиып, бата берді.
Жаңа өткел ғимараты – жай ғана нысан емес, ол еңбек адамдарының қауіпсіз әрі қолайлы жағдайда жұмыс істеуіне арналған игілікті іс. Мұнда өткел кезекшісіне қажетті барлық жағдай қарастырылған: жылыту жүйесі, демалыс бұрышы, байланыс құралдары мен жарықтандыру толық қамтамасыз етілген.
«Бұл нысан біздің теміржолшылардың қауіпсіздік мәдениетін нығайтып, өткел күзетшісінің жұмысын жеңілдетеді. Қолда бар мүмкіндік шеңберінде жолдың да, жолшының да бабы жасалып жатыр, аймақ бойынша бұл үшінші нысан. Бұған дейін Бәйгеқұм, Қамыстыбас станцияларындағы өткел кезекшілерінің ескі ғимараттары сүріліп, жаңадан заманауи тұрғыда қайта салынып пайдалануға берілген болатын. Ең бастысы пойыз қозғалысының қауіпсіздігін сақтау біздің ортақ мақсатымыз», - деді ашылу кезінде Ербол Саулебеков.
Сексеуіл жол дистанциясы аймақтағы ең жас дистанция болғанымен теміржол дәстүрі мен еңбек жолының тоғысқан мекеніне айналып отыр. Осы үрдіске сай өткелдің ашылу салтанаты кезінде де теміржолшы кәсібінің қыр-сыры тілге тиек сала ардагерлері, дәстүр бойынша жастарға, ұжымға бата берді. Салалық кәсіптің майталмандары болған зейнеткерлер мен шараға жиналғандарға ұжымның кәсіподақ ұйымы атынан құрмет көрсетіліп ардагерлердің батасы алынды. Мұндағы әрбір жаңалық, әсіресе қауіпсіздік саласындағы жаңғыртулар теміржолшылар еңбегіне көрсетілген құрмет.
Өткел теміржол өмірінің кішкентай ғана бөлігі болып көрінгенімен, оның маңызы зор. Себебі дәл сол өткелде күн сайын жүздеген пойыз, мыңдаған жолаушының тағдыры қозғалыс қауіпсіздігіне байланысты. Сондықтан жаңа өткел пунктінің ашылуы аймақ теміржолшыларының кәсіби еңбегінің тағы бір жемісі.
Сексеуілдік жолшылардың бұл еңбегі теміржолдағы тұрақтылықтың, тәртіптің және қауіпсіздіктің нышаны.