Қағаз мұрағаттан цифрлық платформаға дейін

Семей ЖТ бөлімшесі бойынша әсіресе жас мамандар үшін кәсіби білім-біліктерін шыңдауда техникалық кітапхананың маңызы зор. Жергілікті кітапхананың ашылғанына биыл тура 90 жыл.

Алғашқыда Түрксіб теміржолшылары үшін сауат ашу мен техникалық ағартудың алғашқы баспалдағы болған осынау іргелі мәдени орын бүгінде аймақтағы бірегей үлкен цифрлық платформаға айналған.  

Қазіргі таңда бұл техникалық кітапхана бірыңғай деректер базасын, электрондық құжаттарды және нормативтік-құқықтық ақпараттарды біріктіретін «электрондық цифрлық кітапхана» ақпараттық жүйесіне айналып отыр. Заманауи технологиялар пайдаланушыларға қажетті материалдарды оңай табуға, білім деңгейін арттыруға және теміржол саласы қызметкерлерінің ақпараттық мәдениетін қалыптастыруға зор мүмкіндік береді. Яғни 90 жыл – жай уақыт емес, қағаз мұрағаттардан цифрлық технологияларға, анықтамалықтардан интеллектуалды ақпараттық порталға алып келген ұзақ та мағыналы даму жолы.  

НЖС-6 бөлімшесінің ғылыми-техникалық және талдау орталығының бастығы Баршагүл Омарованың айтуынша, электрондық материалдан бөлек кітаптар мен мерзімдік баспасөздің орны әлі де ерекше. Себебі мұнда тек желі бойындағы теміржолшылар ғана емес, қаладағы Шәкәрім университеті мен теміржол колледжінің студенттері де қажетті әдебиеттерді жиі сұрап келеді екен. Әсіресе еңбек қорғау мен пойыз қозғалысы қауіпсіздігі бойынша кітаптар үлкен сұранысқа ие. Тіпті кеңес дәуірінде жарық көрген әдебиеттер де оқырман қолынан түспейді.  

Осы шаралардың сыртында кітапхана қызметкерлері бөлімше көлемінде өткізілетін түрлі іс-шараларда техникалық бағыттағы кітаптар мен басылымдардан арнайы тақырыптық көрме әзірлеуді де кеңінен жолға қойған.  

Түйіндей айтсақ, техникалық кітапханасы теміржолшылар мен болашақ сала қызметкерлері үшін білім мен дамудың сенімді көзі екені анық.