Теміржолшылар мүддесі жолында
"Қазақстан теміржолшысы" газетінің Жамбыл облысындағы меншікті тілшісі
Бүгінде 120 жылдығын атап өтіп отырған Теміржолшылар кәсіподағының тарихында Жамбыл филиалының да өзіндік орны бар. Жамбыл жол бөлімшесінде сақталған деректерді ақтарғанымызда, теміржолдағы кәсіподақ қызметі өңірге Түрксіб теміржолының құрылысымен қатар пайда болғанына көз жеткіземіз.
Жамбыл темір жолында аудандық кәсіподақ комитетінің алғашқы төрағалары қатарында Секербек Тулақов, Бенджамин Кудиновтің есімдерін кездестірдік. Олар өткен ғасырдың 60-70 жылдары кәсіподақ ұйымдарын басқарған.
– Теміржол саласын реформалау мен қайта құрылымдауға байланысты кәсіподақ ұйымының құрылымында да сан алуан өзгерістер орын алып отырған. Жамбыл станциясының жол бөлімшесі жанындағы аудандық комитет 1994 жылы Жамбыл жол бөлімшесінің теміржолшылар кәсіподағының облыстық комитеті атанған. Қазақстан теміржолшылары және көлік құрылысшылары кәсіптік одағының Жамбыл аудандық кәсіподағының төрағасы болып Төлен Сәменов, Адылхан Ахметов қызмет атқарды. Соңғысы 1994-2000 жылдар аралығында облыстық кәсіподақ басқармасының төрағасы қызметін атқарады. 2000-2006 жылдар аралығында кәсіподақ филиалының бірінші төрағасы болды.
2000 жылы «Қазақстан Республикасының теміржолшылар кәсіподағы» қоғамдық бірлестігінің Жамбыл филиалы, 2014 жылы «Қазақстандық салалық теміржолшылардың кәсіптік одағы» қоғамдық бірлестігінің Жамбыл филиалы аталса, 2015 жылы «Теміржол, автомобиль, әуе және су көлігі қызметкерлерінің қазақстандық салалық кәсіптік одағы» қоғамдық бірлестігінің Жамбыл филиалы болып қайта құрылды.
2006 жылдың мамыр айында өткен кезекті сайлауда теміржолшылар Жамбыл жол бөлімшесінің кәсіподақ филиалының төрағасы лауазымының тізгінін Жұман Сәменовке сеніп тапсырды. Көп жыл теміржолшылардың мүддесі үшін адал қызмет атқарып, абыройға бөленген Жұман Тұрғымбайұлы биыл құрметті демалысқа шығып, бұған дейін бастауыш кәсіподақ ұйымын басқарған Ерболат Жидебаев төрағалыққа сайланды, – деп тарқатады ұйымның құрылу тарихын кәсіподақ филиалы төрағасының орынбасары Еркін Өтешов.
Бүгінде Жамбыл филиалына қарасты 18 бастауыш кәсіподақ ұйымы табысты жұмыс атқаруда. Биыл жаңадан өткен есеп беру-сайлау конференциясын талапқа сай өткізіп, теміржолшылар игілігі үшін тер төгуге лайық кәсіподақ жетекшілері таңдалды.
Адал еңбек қағидасын басшылыққа ала отырып жұмыс істейтін кәсіподақ филиалы теміржолшылардың құқығын қорғаумен қатар, оларды ынталандыруды да назардан тыс қалдырмайды. Өз міндеттерін мінсіз атқарған мамандарды мерейлі мерекелерде түрлі марапатқа ұсынып отыруы дәстүрге айналған.