Тоқсан жасаған Тамара әжей
Атырау облысы бойынша меншікті тілші
Темір жолда көп еңбек қолмен атқарылған өткен ғасырда жұмыс істеген Тамара Омарғалиева бүгінде тоқсан жасын тойлап отыр.
Өмір бойы Гурьев темір жолында еңбек еткен әжейді Атырау магистральдық желі бөлімшесінің директоры Аралбай Қосымбаев кәсіподақ пен кадр бөлімі мамандарымен бірге арнайы құттықтай барып, құшағын гүлге толтырып, сый-сияпаттарын табыс етті. Әжейдің амандығын біліп, хал-жағдай сұрасып, өткен-кеткеннен әңгіме тарқатты.
Тамара әжей 1935 жылы дүниеге келген. Еңбек жолын Главпочтада бастап, 1967 жылы Гурьев теміржол бөлімшесіне ауысып, 1985 жылға дейін жүк тасымалы бөлімінде қызмет атқарады. 1985 жылы зейнеткерлікке шыққан соң да еңбектен қол үзбей, Гурьев вокзалының Ана мен бала бөлмесінде кезекші болған. Жолдасы Иманғазиев Камали аға да теміржолшы болды. Ол әсіресе аймақ темір жолының спортын дамытуға көп күш салып, кезінде ДСО «Локомотив» қоғамының төрағасы болған азамат. Екеуі 9 бала тәрбиелеп өсірді. Оның ішінде бүгінде зейнеткер Күләш, Роза атты екі қызы мен ұлы Ринат теміржолшы. Ринат та әке жолын қуып, өңір темір жолының спортын көтеруге атсалысып жүр.
Торқалы тоқсанға келген кейуана қонақтарға қатты қуанып, алғысын жаудырды. Әжей әлі де тың, өзі жүріп-тұрады, көзі көреді, құлағы естиді. Бүгінде ұл-қыздарынан 18 немере-жиен, 17 шөбере сүйіп отыр.