Теміржолшылар әулеті «Мерейлі отбасы» жеңімпазы атанды
Атырау облысы бойынша меншікті тілші
«Мерейлі отбасы» ұлттық байқауы – рухани және отбасылық құндылықтар мен отбасы институтын нығайту мақсатында елімізде 2014 жылдан бастап өткізіліп келеді. Биыл он екінші рет өткізіліп отырған байқауға Атырау облысы Құрманғазы ауданындағы Ақкөл ауылынан Өтеповтер отбасы қатысып, жеңімпаздар қатарынан көрінді.
Отағасы Зияпеден Өтепов– ардагер-теміржолшы. Ол 1953 жылы Теңіз ауданы Даңғызыл ауылында дүниеге келген. 1971-1973 жылдары Ақтөбе теміржол училищесінде машинист көмекшісі мамандығы бойынша білім алып, еңбек жолын Атырау локомотив депосына қарасты Ганюшкино айналым депосында машинист көмекшісінен бастап, қырық жыл тепловоз тізгіндеген машинист болды. Зайыбы Мағауира екеуі екі қыз, екі ұл өсіріп жеткізіп, бүгінде тоғыз немере, бес жиенінің тәрбиесімен айналысып отырған жайы бар. Әуелі аудандық, сосын облыстық байқауда жеңімпаз атанған отбасы республикалық байқауда да үздік отбасының бірі ретінде танылып, диплом, ескерткіш сыйлық пен 1 миллион теңге қаржылай сертификатқа ие болды.
– Әке-шешенің бұл өмірде ұрпағына берер ең басты міндеті – ол үлгілі, әдепті тәрбие беру. Біз балаларымызға соны сыйлай алдық деп ойлаймыз. Екі балам мен бір қызым менің жолымды жалғастырып теміржолшы мамандығын таңдады. Кенже қызым Самал геолог, бәрі де отбасылы, бала-шағалы. Республикалық байқауға жеткенімізге, ел басшыларының қолынан марапат алғанымызға өте қуаныштымыз, – дейді Зияпеден аға.
Мерейлі отбасының тұңғышы Толқын Ганюшкино станциясында билет кассирі, үлкен ұлы Берік әкесі сияқты тепловоз машинисі, кенже ұлы Қуаныш станцияда жұмыс істейді. Зияпеден аға салауатты өмір салтын ұстанатын, нағыз спортшы десек, артық айтқандық емес. Үнемі тренажердан түспей, әр түрлі жаттығулар жасап, дене шынықтырумен айналысады. Оған қоса қазақтың байырғы хоббиі аңшылықпен айналысатын өнері бар, құралайды көзге атқан мерген. Түз тағысы қасқыр сынды жартқышты ұстап, үкіметке өткізеді. Тағы бір өнері – өзі аулаған бағалы жануарлар терісінен коллекция да жинайды. Ал Мағауира апай – отбасының ұйытқысы, ерінің сенімді серігі, шаңырақтың берекесі, қолы ашық, қонақжай, «Үйдің иесі де, киесі де – ер-азамат қой» деп отыратын парасатты жан. Міне, осындай отбасының байқаудан жеңімпаз атануы, мерейлі болуы – заңды-ақ құбылыс.