Еңбек құқығының бұзылуына жол жоқ
Абай облысы бойынша меншікті тілші
Семей ЖТ бөлімшесінде теміржолшылардың құқығын қорғау, еңбек жағдайын жақсарту, компанияның әлеуметтік бастамаларын іске асыру бойынша жүйелі жұмыс жүргізілуде. Бұл ретте кадр бөлімі мамандары мен салалық кәсіподақ тарапынан айтарлықтай іс тындырылған.
Десек те, еңбек қатынастары бойынша кейбір құқықтық мәселелер әлі де өзекті. Жуырда семейлік теміржолшылар Астанадан арнайы келген компания омбудсмені Қанат Әлмағамбетовпен кездесу өткізді. Жиынға бөлімше басшысы Алмас Сейсемқанов, Семей магистральдық желі бөлімшесінің директоры Айдын Шәукежанов, кәсіподақ ұйымдары төрағалары мен кадр бөлімінің мамандары және желі бойынан келген жұмысшы мамандар қатысты.
Басқосу барысында еңбек қауіпсіздігін сақтау, жұмыс орындары жағдайын жақсарту, еңбеккерлердің заңды құқықтарын қорғау жайлы сөз қозғалды.
Өз сөзінде компания омбудсмені Қанат Есмұханұлы теміржолшылардың ел экономикасын көтеру мен көлік-логистика саласындағы маңызды рөлі жайында айта келіп, жергілікті еңбеккерлер тарапынан көтерілген кез келген өзекті немесе даулы мәселелерді шешуде қолдау көрсетуге даяр екенін жеткізді.
Жалпы, ел шығысындағы теміржол саласындағы ұжымдық ахуал қалыпты. Сотқа дейін апаратын жанжалдар жоққа тән. Оның бір себебі – еңбеккерлер мүддесі бірінші орынға қойылады. Соңғы айлар бойынша еңбек даулары мен жалақы бойынша арыз-шағым тіркелмеген. Ал әлеуметтік мәселелер бойынша көмек сұрап келген азаматтарға салалық кәсіподақ тарапынан жәрдем көрсетілуде.
Бұл орайда НОД-ЖТ кәсіподақ ұйымының төрайымы Айгүл Берікболова мен НЖС-6 бөлімшесінің кадр бөлімінің бастығы Данияр Баймағұлов түсінік беріп өтті. Жиын барысында желі бойынан жиналған теміржолшылар бірқатар мәселелер бойынша сауалдарын жолдап, әлеуметтік қорғауды жандандыру, еңбек Заңнамасы жайлы пікір ұсыныстарын да білдірді. Ардагерлер атынан Құрметті теміржолшы, «Түрксіб-Семей» мұражайының құрметті директоры Мақсұт Көшжанов сөз алып, компания омбудсменіне жергілікті теміржолшылар атынан алғыс білдірді.
Сонымен қатар Қанат Есмұханұлы бөлімше еңбеккерлерінің жұмыс орындарын аралап көріп, қалыптасқан қызметтік ахуалмен танысты.