Шуда тәулігіне 6 мыңнан астам вагон тексеріледі
"Қазақстан теміржолшысы" газетінің Жамбыл облысындағы меншікті тілшісі
Жамбыл вагон пайдалану депосына қарасты Шу станциясындағы вагондарға техникалық қызмет көрсету пункті арқылы тәулігіне 6 мыңнан астам вагон тексеруден өтеді. Тоғыз жолдың торабындағы станция үшін бұл – қалыпты жүктеме.
Жұмыс ауқымдылығына орай тәулігіне ең кемі 5-6 вагоннан түрлі ақау анықталып, тиісінше құрамнан ағытылып жөндеуге жіберіледі немесе ағытылмай-ақ тиісті қызмет көрсетіліп, әрі қарай жөнелтіледі. Жалпы Шудағы орталықта ай сайын шамамен 205 464 вагонға, ал тәулігіне орта есеппен 6 628 вагонға техникалық қызмет көрсетіледі.
Орталықта негізгі үш цех: ағымдағы ағытылған вагондарды жөндеу, вагондарды дайындау және автоматты бақылау пункттері жұмыс істейді. Қызмет көрсету учаскесінің жалпы аумағы 1256 шақырым болса, кепілдік қызмет көрсету учаскесінің ұзындығы – 1607 шақырым. Биыл вагондарға техникалық қызмет көрсету орталығында су құбырлары жаңартылып, су айдауыш жаңа сорғы орнатылыпты. Бұл өз кезегінде жұмыс процесіне оң әсерін тигізіп, еңбек өнімділігін арттыра түсті.
Шу техникалық қызмет көрсету орталығының бастығы Айдын Қарамолдаевтың айтуынша, вагон қараушылардың еңбек жағдайын жақсартуға айрықша көңіл бөлінеді. Ауысыммен жұмыс істейтін теміржолшылар киініпшешініп, ас-ауқаттарын ішіп, бір ауық дамылдайтын орында бар жағдай жасалған, жылы да жайлы, былтыр қысқатолқынды пеш пен үш тоңазытқыш сатып алынған. Шу пунктінде жұмыс істейтін 240 адамның ішінде теміржол саласында үздіксіз 10, 20, 30 жыл еңбек етіп келе жатқан 100 қызметкерге бірреттік сыйақы беріліп, арнайы төске тағатын белгі тапсырылған.
– Қызметкерлердің орташа еңбек өтілі 15-20 жылды құрайды. Салада үздіксіз жұмыс істегендердің мерейі өсіп, биылдан бастап қаржылай сыйақы алып бастады. Сондай-ақ өз міндетіне жауапкершілікпен қарап, кәсіби біліктілігімен жетістікке жеткендер де аз емес. Солардың бірі Ардақ Шаңлақпаев «Құрметті теміржолшы» атанды. Дүниежүзілік еңбекті қорғау күніне орай Назымкүл Орымбаева Алғыс хатпен марапатталса, Нұржан Жанкиев пен Әлім Жавтуков «Үздік маман» төсбелгісіне ие болды, – дейді Айдын Бейсеханұлы.
Вагондарға техникалық қызмет көрсетудің қыр-сыры Айдын Қарамолдаевқа етене таныс. Теміржолшыларға қажетті материалдық қолдау көрсетіліп, ынталандырып отырғанда ғана еңбек өнімділігі артып, жұмыс сапасы жақсара түсетінін жақсы түсінеді. Өйткені өзі теміржол саласындағы еңбек жолын өзі туып-өскен Шоқпар станциясында 2007 жылы вагон қараушы болып бастаған.
– Шойын жолдың бойында, теміржолшылар әулетінде туыпөскен соң әке жолын жалғауды жөн көрдім. Ата-анам осы салада еңбек етіп зейнетке шықты. Алматы көлік және коммуникация колледжін, Алматы жол қатынастары университетін бітіріп, Шоқпарда вагон қараушы болып 9 жыл жұмыс істеп, Шудағы осы орталыққа ауыстым. Бір жылдан соң нұсқаушы, биыл қаңтардан бастап орталықты басқарамын, – деп сыр тарқатты Айдын Қарамолдаев.
Орталықтағы үш цех тоқтаусыз жұмыс істейді. Әр пункттің көрсететін қызметі бөлек болғанымен, негізгі міндет біреу – вагондарды қайтадан сапқа қосу, қозғалыс қауіпсіздігін қамтамасыз ету.
