Кәсібилікті шыңдау жолында

Жуырда Семей магистральдық желі бөлімшесіне өндірістік оқыту шеберлерінің десанты келіп түсті. Атап айтсақ, ПЧ Балқаш, ЭЧ Қызылорда, ШЧ Қарағанды сынды бірқатар мекемелерден келген шеберлер нұсқаулық аясында дәрістер өткізді.

Семей жол дистанциясының базасында еңбекті қорғау және жұмыс орындарындағы өндірістік қауіпсіздік мәселелері бойынша өткен танымдық-тағылымдық маңыздылығы зор шараға қос бағытқа қызмет көрсететін ПЧ39 жолшыларынан бөлек жол шеберлері мен еңбекті қорғау инженерлері жиналды. Теміржолшылар алдында Магистральдық желі дирекциясының еңбек қорғау және қауіпсіздік, өнеркәсіптік қауіпсіздік және экология департаментінің бас менеджері Айгүл Ерімбетова сөз алып, тақырып аясында кеңінен сөз өрбітті.  

Жиынның келесі бөлімінде желі бойындағы қауіпсіздік шараларын сақтамаудың себеп-салдары бойынша нақты мысалдар келтіріліп, тұшымды дәріс өткізілді. Бұл орайда Балқаш жол дистанциясынан келген, жол саласында 30 жылдан аса тәжірибесі бар өндірістік оқыту шебері Олег Дмитриевич сөз алып, өзекті тақырыптарды қозғады. Әсіресе жолшылар үшін маңызды саналатын қысқы мезгілде бағыттамалы бұрмаларды тазалау барысындағы сақтық, қарлы-боранды күндердегі қауіпсіздік талаптары бойынша әңгіме қозғалды. Жиналғандар алдында деректі танымдық фильмдер көрсетіліп, талқылаулар да ұйымдастырылды. Жол шеберлері мен еңбекті қорғау инженерлері ортақ тақырып аясында пікір алмасты. Тәжірибелік мақсатта практикалық жұмыстар да жүргізілді.  

Семей НЖС-6 бөлімшесінің еңбекті қорғау бөлімінің бастығы Жомарт Шапишевтің айтуынша, бүгінгі таңда шығыстағы желі бойынша, әсіресе жол шаруашылығында еңбекті қорғау талаптарын өрескел бұзу фактілері жоқ. Десек те, мұндай оқыту жұмыстарының маңызы қашанда зор. Әрдайым ізденісте жүрудің берері мол.  

Семей жол дистанциясының еңбекті қорғау және қауіпсіздік жөніндегі жетекші инженері Гүлзавира Елемесованың сөзіне сүйенсек, еңбекті қорғау шараларын ұйымдастыруда жыл басынан бері кешенді жоспар жасалынып, қажетті көлемде қаражат бөлінген. Әрбір тоқсан бойынша белгіленген қаржы толық игерілуде. Соның нәтижесінде болар, бүгінде дистанция көлемінде өндірістік жарақаттануға жол берілген жоқ. Оның сыртында жүрек-қан тамыры ауруларының алдын алуда да кешенді түрде жұмыстар жүргізілуде. Бұған осындай семинарлар мен техникалық дәрістердің де септігі тиюде.