«TemirSkills – 2025» кәсіби шеберлікті шыңдайды
"Қазақстан теміржолшысы" газетінің Жамбыл облысындағы меншікті тілшісі
Жамбыл облыстық білім басқармасының «Техникалық және кәсіптік білім беруді дамыту орталығы» мен Тараз теміржол көлік және коммуникация колледжі бірлесіп, «TemirSkills – 2025» атты кәсіби шеберлік байқауын өткізді.
«Жұмысшы мамандықтары жылына» орай ұйымдастырылған байқауға өңірдегі «Дәнекерлеу ісі» және «Токарлық ісі» құзыреттіліктері бойынша мамандар даярлап отырған техникалық және кәсіптік білім беру ұйымдарының, Қырғыз Республикасы Есік кол облысы Балықшы қаласы Т. Ибраев атындағы №22 кәсіптік лицейдің 1-2 курс студенттері қатысты.
– Біздің колледж темір жол саласына керек кәсіби мамандармен қатар, дәнекерлеуші, токарь секілді жұмысшыларды даярлап, еңбек нарығындағы сұранысты өтеп келеді. Бүгінде түлектеріміздің шойын жолдың көптеген құрылымдық бөлімшелерінде, «Луговой рельс дәнекерлеу кәсіпорнында» табысты еңбек етіп келе жатқаны – сөзіміздің дәлелі. «TemirSkills – 2025» байқауында бақ сынаған басқа колледждердің студенттеріне осы екі мамандық бойынша темір жолға жұмысқа орналасу мүмкіндіктерін айтып, кәсіби бағдар бердік. Жалпы жұмысшы және техникалық кәсіби мамандықтарды таңдаған жастардың өз кәсібіне деген қызығушылығын арттыру, практикалық тәжірибе алмасуына мүмкіндік туғызу мақсатында ұйымдастырылған іс-шарамыз көздеген үдеден шықты, - дейді Тараз теміржол көлік және коммуникация колледжі директорының өндірістік оқыту ісі жөніндегі орынбасары Жеңіс Тайбеков.
Жұмысшы мамандардың оң имиджін қалыптастыру, кәсіптік білім беру жүйесінде жас шеберлерді анықтауды мақсат тұтқан байқауда болашақ дәнекерлеушілер арасында №9 Меркі колледжінің студенті Сабыржан Нұрислам 1-орынды жеңіп алды.Тараз теміржол көлік және коммуникация колледжінің студенті Виктория Киселёва 2-орынды еншіледі. Құлан агротехникалық жоғары колледжінен келген Дмитрий Пивнев 3-орыннан көрінді.
Ал «Токарлық ісі» мамандығы бойынша білім алып жатқан жастар арасында Меркі ауданынан келгендер олжалы қайтты. №9 Меркі колледжінің екі бірдей студенті Алдияр Асанбек пен Виктор Вольф бірінші және үшінші орынның жүлдесін жеңіп алса, Тараз теміржол көлік және коммуникация колледжінің студенті Дильёр Тохтаназаров 2-орынды иеленді.
«TemirSkills-2025» облыстық кәсіби шеберлік байқауының жеңімпаздары мен жүлдегерлеріне дипломдар мен бағалы сыйлықтар тапсырылды.