Күзет қырандарына құрмет

9 желтоқсан – теміржол көлігіндегі әскерилендірілген күзет қызметінің құрылған күні. «ӘТЖК» ЖШС-нің Семей филиалы 104 жылдық кәсіби мерекелерін атап өтті. Теміржол бойындағы күзет қырандары үшін бұл күн өткенге есеп, келешекке жоспар жасалған ерекше іс-шара болды.

Мерекелік жиынға филиал басшылары мен желі бойындағы күзетшілер, Семей ЖТ бөлімшесі басшылығы арнайы қатысты. Барша қатысушыларды бөлімше басшысы Алмас Сейсемқанов кәсіби мерекемен құттықтады.

Жалпы, 1394 шақырымды құрайтын Семей теміржолында нысандар мен жүк және жолаушы пойыздарының қауіпсіздігін қамтамасыз ететін құрылымның жұмысы бүгінде жүйелі жүргізілуде. Бұл жайында Семей филиалының директоры Самат Райымбеков өз құттықтау сөзінде кеңінен тоқталып өтті. Жылдың өткен он бір айында филиалдың мобильді шұғыл әрекет ету тобы күзетшілерінің қырағылығы арқасында бір емес, бірнеше ұрлықтың алды алынған. Шекаралық аймақ саналатын Семей ЖТ бөлімшесі үшін желі бойындағы қылмыстарға жол бермеудің маңызы жоғары. Сондықтан кәсіби мерекеге орай білікті мамандар лайықты марапатқа ие болды. Атап айтсақ, Шыңғыс Мамырбеков, Думан Оспанов, Ильдар Алишев, Нұрбек Капсаметов сынды өз ісінің хас шеберлері алғыс хат алды.  Филиал басшысы Самат Ғазизұлы еңбекте жетістікте жетіп жүрген әріптестерін салтанатты түрде марапаттап, алғыс айтты.  

– Бүгінде филиал қарамағындағы нысандар сапалы күзет жасақтарымен қамтылғандықтан ұрлық-қарлық, бұзақылық орын алмаған. Әскерилендірілген күзет қызметі қылмыстың алдын алумен қатар, құқықбұзушылықтың жолын кесумен де ерекшеленеді, – дейді бұл ретте пікір білдірген филиалдың кәсіподақ ұйымының төрағасы Амантай Қатпенов.

Түйіндей айтсақ, «ӘТЖК» ЖШС Семей филиалының ұжымы алдағы уақытта да өзіне жүктелген міндеттерді жауапкершілікпен орындауға толық мүмкіндігі бар. Бүгінгі таңда басшылық пен кәсіподақ тарапынан барлық қолайлы еңбек жағдайы жасалған.    

Салтанатты жиын соңы күзет қырандарының құрметіне аналған мерекелік концерттік бағдарламаға ұласты.