Білім-біліктілік сынға түсті

Жамбыл магистральдық желі бөлімшесінде үздік станция кезекшілері арасында «Менің ойыным» атты зияткерлік байқауы өтті.

Байқауға қатысушыларға сәттілік тілеген Жамбыл магистральдық желі бөлімшесі директорының операциялық қызмет бойынша орынбасары Бауыржан Устаев семинар-тренинг форматында ұйымдастырылған жарыстың негізгі мақсатына тоқталып өтті.  

– Байқау станция кезекшілерінің біліктілік деңгейін анықтауға мүмкіндік береді. Ал қатысушылар үшін бұл – теориялық білімдерін арттырып, тәжірибе жүзіндегі кәсіби дағдыларын нығайтуға арналған алаң. Жарысты командалық жүйеде өткізуді жөн көрдік. Себебі ортақ нәтижеге ұмтылу өндірістік еңбек жағдайында ұжымдық топтасуға ықпал етеді, – деді директордың орынбасары Бауыржан Бақытжанұлы.  

Зияткерлік ойында «Тараз-Жаңатас», «Тараз-Түлкібас», «Тараз-Шу», «Шу-Отар» телімі аралығындағы станция кезекшілері төрт командаға бөлінді. Алғашқы сұрақ-жауап кезеңінде қатысушылардың біліктілік деңгейін филиал директорының орынбасары Бауыржан Устаев, қауіпсіздікті қамтамасыз ету бөлімінің басшысы Бақытжан Айтқұлов, тасымалдау шарттарын ұйымдастыру бөлімінің басшысы Болат Әбдуов, техникалық бөлімнің басшысы Арай Сейітов бағалап, жауаптарға қарай қажетінше толықтырып, бағыт беріп отырды. Туындауы мүмкін оқиғаларды мысалға келтіріп, тәжірибеде кездесетін жағдайларды талқыға салды.  

Техникалық бөлімнің басшысы Арай Сейітов байқаудың талаптары бойынша берілетін ұпай санына қарай, қойылатын сұрақтар күрделі болғанын айтады.  

«Шарт бойынша бес бағыттың ішінде ұяшықты таңдаған команда ғана жауап беруі тиіс. Бірақ біз басқалардың өз нұсқаларын айтып, жауапты толықтыруына мүмкіндік туғыздық. Нәтижесінде сауал төңірегінде пайдалы диалог өрбіді. Ашық талқылау болды. Әділ қазылар да қатысушылар жағдайды айқындай түсуі үшін бағыт көрсетіп отырды», – дейді Арай Әлібекұлы.  

Байқау нәтижесі бойынша «Тараз-Түлкібас» телімі командасы жеңіске жетті. «Тараз-Шу» екінші орынды еншілесе, ұпай сандары тең түскен «Шу-Отар», «Тараз-Жаңатас» топтары үшінші орынды өзара бөлісті. Команда жетекшілері Жәнібек Жанысбеков, Мадияр Кебекбаев, Айдос Әшкен, Жанғали Әбиев үздік ойын өрнегін көрсеткені үшін арнайы алғыс хаттармен марапатталды. Белсенді қатысушылар да марапаттан тыс қалған жоқ. Үздіктер мен жүлдегерлерге «Қазтеміржолкәсіп» ҚБ Жамбыл филиалы атынан сыйлықтар тапсырылды.