Семей – Ақтоғай аралығында рейд: теміржол бойындағы күзет жұмыстары тексерілді
Абай облысы бойынша меншікті тілші
Семей ЖТ бөлімшесі бойынша қысқы маусымдағы желі бойындағы қауіпсіздік жұмыстары біршама күшейтілген. Желі бойында ұрлық пен бұзақылықтың алдын алу, мүліктер мен нысандарды бүлінуден қорғау мақсатында әскерилендірілген теміржол күзеті бірқатар кешенді шараларға көшкен.
Мәселен, жуырда ақ түтек боранға қарамастан арнайы рейд өткізілді. Атап айтсақ, Семей – Шар, Шар – Аягөз, Аягөз – Ақтоғай телімдерінің аралығы толықтай тағы бір мәрте сүзгіден өткізілді. Жедел алдын алу іс-шараларына филиал басшысы Самат Райымбековтің өзі жетекшілік етті.
Бұл жолғы төтенше тексеру жұмыстары барысында күзет қырандары желі бойындағы барлық станцияларда болып, тек жергілікті тұрғындармен ғана емес, станция қызметкерлерімен де әңгімелесу өткізді. Әсіресе күзет бекеттері ерекше назарға алынды. Мұндай жұмыстар ауа райының қолайсыздығына қарамастан түнгі мезгілде де жүргізілді. Осы ретте Ақтоғай, Таңсық, Жарма, Жаңғызтөбе сынды тораптық жүк станцияларында ӘТЖК Семей филиалының күзетшілерімен кездесулер өткізіліп, тілек-өтініштері де тыңдалды.
Басшылық құрам бастаған топ станциялық жолдардағы жылжымалы құрамдардың күзетілу барысын тексеріп, вагон парктерінде де болды. Нәтиже көрсеткендей, тиелінген жүктердің амандығы ойдағыдай, жеткізілетін мүліктер сенімді қолда. Түйіндей айтсақ, байтақ Семей теміржолының 1394 шақырымдық телімінде нысандар, жүк және жолаушылар пойыздары қауіпсіздігін қамтамасыз ететін жігіттердің жұмысы жүйелі атқарылуда.