Вагондарды жөндеу сапасы сөз болды

Атырау вагон пайдалану депосында вагондардың уақытылы әрі сапалы жөнделуі талқыланған дөңгелек үстел өтті.

Оған депо басшылығы, инженерлер, вагон-қабылдап жөнелтушілер, «Ақ-Жайық-7», «Ремвагон», «ТексолТранс» сынды вагон жөндеу мекемелері мен «Қазтеміртранс», «РТС Operator», «РТС Holding», «Про Транс Логистик», «Петролеум» ЖШС вагон меншік иелерінің өкілдері қатысты.  

Жиынға қатысушылар тақырыпты жан-жақты талқылап, вагон жөндеу сапасын жақсартуға арналған ұсыныстарын алға тартты.  

Мамандардың пікірінше, мәселе көбіне вагондардың кепілдік мерзіміне жетпей ақау табылғанынан шығып жатады. Еліміздің магистральды жолымен жүйткіп жүретін ВУ-41 акт-рекламация жасақталған вагондар технологиялық сипаттағы ақау әсерінен ағытылып қалады. Соның ішінде серіппелер, тежегіш құралдары, вагон шанағы, букстың қызып кетуі, доңғалақтың тілініп кетуі, вагон рамасының сынуы, т.б. ақаулар жиі кездеседі. Осындай ақауларға байланысты ағытылған вагондар кінәсі жөндеу мекемелеріне артылып жататыны да рас. Сондықтан да жоспарлы, күрделі және деполық жөндеу сапасын арттыру керек. Ол үшін вагон ағытылған жерлерге жөндеу мекемелері мен вагон иелерінің өкілдерін жіберіп, жасақталған акт негізінде ақау түріне қарай жөндеу цехтарына нақты тапсырмамен шығу қажет. Сонда талап күшейтіліп, жөндеу сапасы да артады деген уәжге тоқтады мамандар.