Қимас сезім, зор құрмет: Ардагер теміржолшылар демалысқа шықты

Семей станциясының ұжымы жуырда станцияда қырық жылдан аса еңбек еткен тағы бірнеше әріптестерін қимас сезіммен әрі зор сән-салтанатпен құрметті демалысқа шығарып салды.

Семей станциясы десек, еңбекті қорғау инженері Гүлмира Масанова, сигнал беруші Мұхтархан Қасенов және сұрыптау дөңесі кезекшісінің операторы Мұхтар Рысақовтарсыз бүкіл ұжымды көз алдыңа елестету мүмкін емес. Өйткені бұл үздік үштік – ұзақ жылдар бойы көш бастаған майталмандар. Сондықтан да болар, оларды  зейнет жасына шығарып салу салтанатына станцияның байырғы және бүгінгі қызметкерлері тайлы-тұяғы қалмай түгел жиналды.  

Жылы естеліктер айтылған әсерлі кеш барысында құрмет иелеріне қазақы дәстүрмен шапан жабылды. Бөлімше басшылығы тарапынан Алғыс хат табыс етіліп, лайықты сый-сияпаттар жасалды.  Ұзақ жылдар бойы бір отбасындай болып кеткен ұжымымен қоштасу кімге де болсын оңайға түспесі анық. Басқосу барысында сөз алған Гүлмира Кенжеханқызы өткен күндерден сыр төгілтті. Құрметті теміржолшы Мұхтар  Алтайұлы да барша ұжым мүшелеріне ақжарма алғысын жеткізді. Сонымен қатар бүгінгі Семей теміржолын сенімді қолға қалдырып бара жатқандарына қуанышты екендіктерін де жеткізіп өтті.  

– Станцияның бетке ұстарлары, үздіктер көшіндегі үш бірдей маманды құрметті демалысқа шығарып салу бізге де оңайға тимей жатыр. Ақылшы аға буын өкілдерінің қамқорлығын көп көрдік. Үйренгеніміз көп болды, – дейді Семей станциясының бас инженері Бекзат Кәрімханов.  

Береке-бірлігі жарасқан кәсіподақ ұйымының төрайымы Шәрбат Мейірманова ұйымдастырған салтанатты іс-шараның соңы ретро би кешіне ұласып, көпшілікке мерекелік көңіл күй мен серпіліс сыйлады.