Білімді маман – білікті маман
Атырау облысы бойынша меншікті тілші
Теміржолшылардың білімі мен біліктілігі талапқа сай болуы үшін мамандардың кәсіби шеберлігін арттыруға үнемі көңіл бөлінеді. Атырау магистральдық желі бөлімшесі өткен жылы жеті жүзге жуық қызметкердің білімін көтерген.
Бұл мақсатта техникалық сабақтар өткізу, онда түрлі жағдайлар мен оқыс оқиғаларға байланысты жеделхаттар оқытылып, сабақ барысында қысқаметражды видеороликтер, ситуациялық схемалар міндетті түрде жұмысшылар назарына ұсынылуы, мұндай жағдайлардың қайталанбау үшін білім деңгейін көтеру аса маңызды.
Атырау магистральдық желі бөлімшесінің персоналды басқару бөлімінің менеджері Анар Жалғаспаеваның айтуынша, жыл сайын басшылар мен қызметкерлер әр түрлі тақырыптағы біліктілікті көтеру курстарынан өтеді. Мысалы өткен жылы Астана қаласындағы «Теміржол көлігі персоналын бағалау және дамыту орталығы» филиалының жоспарына сәйкес «Кәсіпорындарда еңбекті қорғау және қауіпсіздігін қамтамасыз ету» тақырыбында 106 адам, «Өнеркәсіптік қауіпсіздік» бойынша 45 адам, «Біліктілікті жетілдіру» – 51 адам, «Өрт-техникалық минимум» – 77 адам, «Электр қауіпсіздігі» – 30 адам, «Экологиялық қауіпсіздік» – 21 адам – барлығы 330 қызметкер жұмыстан босатылып, 3-5 күн онлайн оқыған. Сондай-ақ жас мамандар немесе басқа лауазымға ауыстырылған мамандар Ақтөбе қаласындағы теміржолшылардың оқу орталығында қайта даярланады. Соған сәйкес 67 адам мамандығы бойынша жұмыстан босатылып, 4 ай мерзімге даярлық курсына барып оқыған және 2 апталық біліктілікті арттыру курсына – 30 адам, 10 сағаттық өнеркәсіптік қауіпсіздікке 218 адам онлайн оқыған. Кадр менеджері атап өткендей, әр мекемеде өндірістік оқыту шеберлері де бар, олар қызметкерлерге ай сайын техникалық сабақ өткізеді, ал учаскелерге арнайы іссапармен барып оқытады. Нәтижесінде өткен жылы жеті жүзге тарта қызметкер білімін көтеріп, біліктілігін арттырыпты.