Жауапкершілік жүгі жоғары
Абай облысы бойынша меншікті тілші
Жуырда Шар станциясында жылашар тораптық кеңес өтті. Семей ЖТ бөлімшесінің бастығы Алмас Сейсемқановтың төрағалығымен өткен басқосуға НЖС-6 бөлімшесі бастығының орынбасары Азат Беркімбаев, «Досжан темір жолы» АҚ директоры А. Рахимов, «Қазтеміртранс» АҚ Семей филиалы директорының орынбасары Айгерім Тоқпанова арнайы қатысты.
Сонымен қатар Аягөз-Шар-Жаңа-Семей теліміндегі қозғалыс саласына қатысты барлық мекеме өкілдері мен Шар станциясының теміржолшылары да келді.
Жиын барысында сөз алған бөлімше басшысы Алмас Ғылымұлы әуелгі кезекте өткен жылдың 12 айы бойынша қозғалыс қауіпсіздігі қорытындысын жариялады. Бөлімше басшысы айтып өткендей, өткен жылы қозғалыс қауіпсіздігіне нұқсан келтірудің төрт фактісі тіркелген. Оның алдыңғы жылы 8 оқиға орын алған еді. Ахуалдың біршама жақсарғанын байқауға болады. Әйтсе де, орын алған келеңсіз жайттардан тиісінше сабақ алу керек. Бұл орайда бірінші кезекте станция қызметкерлеріне түсер жауапкершілік жоғары. Себебі станция басындағы маневрлік жұмыстар кезінде орын алған тосын жайттар бар.
Сол тәрізді бүгінде кірме жолдардағы қозғалыс қауіпсіздігін сақтау мәселесі де күн тақырыбынан түспей тұр. Мәселен, өткен жылдың 12 айында бөлімше көлеміндегі кірме жолдар бойынша 25 кінәрат тіркелсе, алдыңғы 2024 жылы да 21 оқиғаға жол берілген.
Тораптық жиын барысында айтылғандай, РБ-6 аппараты өткен жылғы қозғалыс қауіпсіздігіне нұқсан келтіру фактілеріне жан-жақты сараптама жасаған. Бұл ретте тасымал процесіне қатысушылар тарапынан 78 ереже бұзушылық тіркелген. Ал алдыңғы жылы 89 жайт орын алған еді. Бөлімше ревизорлары жыл бойына жалпы саны 794 тексеру жұмыстарын жүргізіп, 8974 ескерту және 1414 тыйым салу іс-шараларын қабылдапты. Яғни қозғалыс процесі мен тасымал үдерісін қадағалау, бақылау жұмыстары тыңғылықты жүргізіліп жатыр.
Басқосуда Семей магистральдық желі бөлімшесі директорының орынбасары Азат Санмұратұлы да сөз алып, өткен жылғы атқарылған жоспарлы жұмыстар жайында баяндады. Жол күтімінен бастап желі бойындағы мекемелерді жаңғырту жұмыстары биыл да жалғасатынын жеткізді.
Жиын барысында Шар станциясына қатысты бірқатар өзекті мәселелер сөз болып, тиісті тапсырмалар берілді.
Көтерілген мәселелердің барлығы хаттамаға енгізіліп, орындалу барысын қадағалауды бөлімше басшысы өз міндетіне алды.