Тараз станциясында еңбек қауіпсіздігіне арналған тренинг өтті

Жұмыс ауқымы мен жүктемесі жоғары Тараз станциясында қозғалыс күндіз-түні толастамайды. Тараз – Арыс – Шу – Алматы бағытында жолаушылар және жүк пойыздарының қозғалысын реттеп, сұрыптап отыратын станцияда қауіпсіздік мәселесі қашан да өзекті.

Қауіпсіздікке қатысты ортақ талаптар мен нұсқауларды орындауда ескеретін ережелерді түсіндіру, практикалық тұрғыда кеңес беру мақсатында Тараз станциясының бас инженері Ерсін Шардарбеков пен станцияның техникалық кітапханасының бас кітапханашысы Жәнібек Рысбеков станция теміржолшылары арасында «Темір жолдағы қауіпсіз еңбек жағдайлары» атты ақпараттық-тренинг өткізді. Практикалық сабақта теориялық және ақпараттық кеңестер берілді.  

– Әрбір маман өзіне жүктелген міндетті орындауда бірінші кезекте қауіпсіз еңбек талаптарын сақтауы керек. Шойын жолдың бойында өндірістік жағдайда орын алған кез келген келеңсіз жағдайдың салдары ауыр соғуы мүмкін, – деген Ерсін Амангелдіұлы еңбек қауіпсіздігі нұсқауларына тоқталды.  

Ал техникалық кітапхананың бас кітапханашысы Жәнібек Рысбеков әрбір теміржолшыға теориялық, ақпараттық тұрғыда бағыт-бағдар беретін салалық газет-журналдарды таныстырып, жарияланған мақалалар мен сараптамаларға түсінік берді.  

Станцияның маневрлік диспетчері Мақсат Абатов маневрлік жұмыстар кезінде естен шығаруға болмайтын еңбек қауіпсіздігін сақтау туралы нұсқауларды түсіндірді.  

– «Назар аудар, жолда адам!» атты айлығы жарияланғалы бері техникалық кітапхана қызметкерлері темір жолдың құрылымдық бөлімшелерімен бірлесіп ақпараттық түсіндіру жұмыстарын жүргіздік. Қауіп-қатер туралы ескерту, еске салуда медиа кеңістіктің рөлі жоғары. Қазіргі кезеңде ақпарат атаулы әлеуметтік желі арқылы жылдам таралатыны түсінікті. Әйтсе де, газет-журналдарда жарияланған нақты, дәйекті ақпар мен мәліметке сүйенген жөн. Бір ай ішінде жүргізген жұмыстар кезінде біз кітапханаға жазғызып алатын салалық басылымдарды тараттық. Ақпарат бердік. Айлық аясындағы жұмыстарды бүгін міне Тараз станциясында қорытындылап отырмыз, – деді бас кітапханашы Жәнібек Есмұратұлы.