Жүрек қалауы – теміржол

Уыздай жас кезінде таңдаған мамандығына адал болып қалған Гүлмира Жүнісова бүгінде Белкөл станциясындағы сенімді теміржолшылардың біріне айналды. Отыз жылдан астам уақыт станцияда табан аудармай еңбек ету оның кәсібіне деген құрметі мен жауапкершілігінің айқын дәлелі емей не?!  

Жаңақорған өңіріндегі Төменарық станциясы маңында көпбалалы Жұмабай ақсақалдың шаңырағында 56 жыл бұрын дүние есігін ашқан Гүлмира үшін темір жол – бала күнінен таныс саласы.1988 жылы білім іздеп Ресейге аттанып, Қуйбышев теміржол училищесіне түседі.  Осы білім ошағынан станция кезекшісі мамандығын игеріп шығады. Арман қуған жас маман еңбек жолын осы облыстың Мыльная станциясында бастап, бір жарым жыл станция кезекшісі болып еңбек етеді  Бұл жас қыз үшін үлкен тәжірибе мектебі болды. Пойыз қозғалысының ырғағы, диспетчерлік пәрмен, жолаушы мен жүк қауіпсіздігі, т.б. жас маманның кәсіби болмысын қалыптастырды.

1991 жылы туған елге оралып, Белкөл станциясына техникалық кеңсе   операторы болып орналасады. Ал 1993 жылдың наурыз айынан бастап бүгінге дейін осы станцияның кезекшісі қызметін абыроймен атқарып келеді. Отыз жылдан асқан табанды еңбек, бір мекемеде, бір орында үздіксіз қызмет ету – кез келген жанның маңдайына жазыла бермейтін кәсіби адалдықтың айғағы.

Гүлмираның әулет аманаты мен қарапайым еңбекке деген адалдықты ұстануына, теміржол саласын таңдауына жол шаруашылығында еңбек еткен ағасы  Оразбек Жүнісовтің ықпалы болғаны анық. «Ағам секілді теміржолшы болсам» деген ой жас Гүлмираның жүрегіне ерте ұялаған.

Жалпы, бұл болат жолмен біте қайнасқан әулет. Жолдасы Ердәулет Ортеков те теміржолшы әулеттен шыққан, Қызылорда станциясында қызмет атқарған.  

Станция кезекшісінің жұмысы сырт көзге қарапайым көрінгенімен, оның артында үлкен жауапкершілік жатыр. Әр пойыздың қозғалысы, әр бағыттаманың дұрыс қойылуы – қауіпсіздіктің кепілі. Гүлмира Жүнісова үшін бұл жай ғана қызмет емес, бұл – аманат. Белкөл станциясында ол талай буын жас мамандарға үлгі болды.  

– Темір жол – төзімділікті, тәртіпті, сергектікті талап ететін сала. Осы қасиеттердің бәрі Гүлмираның бойынан табылады. Таңғы ауысым болсын, түнгі кезекшілік болсын, ол үшін ең бастысы – пойыздардың қауіпсіз қозғалысы. Қашан да ширақ, жинақы, жұмыс орны тап-тұйнақтай, ұқыпты, – дейді станция бастығы Сұлтанахмет Жантөреұлы.