Айкүннің таңдауы

Көктем хабаршысы – әйелдер мерекесі қарсаңында теміржол саласында табанды еңбегімен танылған нәзік жандар туралы айтпау мүмкін емес. Солардың бірі – Айкүн Бердрахманова. Ол 41 жыл бойы бір мекемеде үздіксіз еңбек етіп келеді, 7-разрядты электромонтер.

Айкүн темір жолға 1984 жылы, небәрі 18 жасында келген. Техникумды тәмамдай сала Ақтөбедегі ШЧ-5 мекемесіне 4-разрядты электромонтер болып қабылданады. Содан бері сол ұжымда яғни Ақтөбе сигнализация және байланыс дистанциясында қызмет етіп, бүгінде 7-разрядты білікті маман. Жалпы еңбек өтілі – 41 жыл 7 ай.

Оның жұмыс орны – Бестамақ станциясының горловинасы. Мұнда ол бағыттар мен бұрмалардың, бағдаршамдардың, электр желілерінің ақаусыз жұмыс істеуін қадағалайды. Күн сайынғы жұмыс инструктаж-нұсқамадан басталып, жоспарлау жиынымен жалғасады. Технологиялық карта зерделеніп, аға механик тапсырманы нақтылайды. Содан кейін механикпен бірге нысанға шығып, кешке дейін белгіленген жұмыстар атқарылады.  

– Бағыттар қозғалысында мін болмауы керек. Сигнал уақытында қосылуы тиіс. Барлығы техникалық талапқа сай болуы – біздің міндетіміз. Әр саланың өз қиындығы бар. Біздің мамандықта тәртіп пен дәлдік қажет. Электр желілерін бақылау – үлкен сенім. Сондықтан әр бөлшекке мұқият қараймыз, – деді тәжірибелі электромонтер.

Кейіпкеріміздің әр күні ашық аспан астында өтеді. Қар, жаңбыр, аяз немесе аптап ыстық теміржолшылар жұмысына әсер етпейді,  қауіпсіздік пен жауапкершілік бірінші орында.

Айкүнге кеңседе тапжылмай отыратын жұмыс емес, осы қозғалыстың ішінде жүрген ұнайды. Күнұзақ теміржолмен біте қайнасып, өзін алып сала тамырының бір бөлшегі сезінеді. Желідегі байланысты үздіксіз қан айналымын реттейтін күретамырға теңейді.  

«Темір жол – менің өмірімнің бір бөлігі. Өз таңдауыма ешқашан өкінген емеспін. Менің бар өмірім осы жерде өтті», – дейді ол.