Индираның наурыз көжесі

Жамбыл магистральдық желі бөлімшесінің ұжымы персоналды басқару бөлімінің бастығы Индира Қоңқашеваның наурыз көжесін мақтағанда еріксіз тамсанасыз. «Тілі дәм үйіретін ондай наурыз көже ішкен емеспін» дейтіндер көп.

– Жыл сайын Жамбыл магистральдық желі бөлімшесі мен Жамбыл жүк тасымалы бөлімшесі бірлесіп, Ұлыстың ұлы күнін және теміржолшылар мерекесін ерекше атап өтеді. Жыл басы саналатын Наурызда «Түрксіб» саябағында ақшаңқан киіз үйлер тігіліп, алтыбақан құрылып, ән-думанға бөленеді. Осы мерекелерде барлық ұйым мүшелері белсенді атсалысып, түгел үлес қосады. Көктем тойында өзім жақсы көретін наурыз көже, сырбаз пісіремін. Наурыз көженің дайындау тәсілін анам үйреткен, сырбаз жасауды енемнен үйрендім, – дейді Индира.  

Өскен-өнген әулетте қазан жиі көтерілетіні белгілі, сондайда ғұрыптық асты жиі дайындайтындығының пайдасы осындайда тиеді. Теміржолшылар Индира Шаяхметқызы пісірген дәмі тіл үйіретін наурыз көжені ішуге асығып тұрады.  

– Жалпы наурыз көженің ғұрыптық мәні бар. Оны қазақ халқы өзінің дәстүрлі шаруашылығына сай бейімдеген. Төрт түлік төлдеп жататын кезең болғандықтан Ұлыс күнінде мал соймайды. Бір жағынан бұл қыстан мал басы бүтін шықсын, жылдан-жылға аман жетейік деген тілек пен ниеттен туған. Міне, сол үшін наурыз көжені жылқының сүрленген етімен дайындайды. Алдымен қабырға, жая, қазы, қойдың сүрленген құйрығын жақсылап жуып, қазанға салып, жақсылап баптап қайнатамыз. Көже жасағаннан 5-6 сағат бұрын ақ және сары түсті тазаланған жүгеріні жуып, жылы суға жібітіп қоямыз. Ал бидай, машты жібітпей-ақ қосса болады. Сүр ет ұзақ қайнайтын болған соң, бұл дәндерді көжеге ертерек саламыз. Көкөністерден – пияз, картоп, сәбізді майдалап турап саламыз. Барлығы пісейін деп тұрғанда, илеп-жайып кеспе саламын. Көже пісіп, дайын болғанда айран, қатық, ерітілген құрт қосуға болады, – деп Ұлыстың ұлы күнінде пісірілетін ғұрыптық асты дайындау тәсілімен бөліскен Индира Шаяхметқызы келін боп түскен шаңырақта теміржолшылар әулетін жалғастырушы екенін мақтанышпен жеткізді.