Теміржолшылар ауылында

Шығыстағы барша теміржолшылар қауымы үшін биылғы Наурыз мерекесі думанға толы болды. Шаһар орталығындағы «Теміржолшылар ауылында» бұл күні қаз-қатар киіз үйлер тігіліп, алтыбақан құрылды.

Алаңға шаһар жұртшылығы ерте жиналды. Тойшыл қауым үшін сала қызметкерлері арнайы дастархан жайып, тегін наурыз көже мен бауырсақ таратты.  

Әуелгі кезекте сахна төрінде әжелердің дәстүрлі «аластау» рәсімі өткізіліп, соңынан мерекелік құттықтауларға кезек берілді. Жұртшылық алдына шыққан Құрметті теміржолшы, бірер айда 89 жасқа толатын қадірменді қария Қырықбай Әлсейітұлы бата берді. Сонымен қатар Семей ЖТ бөлімшесінің басшысы Алмас Сейсемқанов та құттықтау лебізін білдірді.  

Осыдан соң мерекелік бағдарламалар жалғастық тауып, нағыз думан басталды. Қаладағы өнерпаздар ұжымы ұлттық нақыштағы ән мен биге кезек берсе, қаз-қатар тізілген киіз үйлерге ағылған көпшілік ет пен қымыз, наурыз көжеден дәм татты. «Қазтеміржолкәсіп» ҚБ Семей өңірі бойынша өкілі Асқар Қажығұлов, Семей ЖТ кәсіподақ ұйымының төрайымы Айгүл Берікболова және кәсіподақ белсенділері Зульфия Еникеева, Серік Дүйсенбай, Шәрбат Мейірманова бастаған топ меймандарды қарсы алып, шығарып салып отырды. Ақ дастарханға ризашылық білдірген көпшілік «Ақ мол болсын!» деп тілектестік білдіріп, алғыстарын жаудырып жатты.  

Теміржолшылар ауылына жергілікті атқарушы билік өкілдері де бас сұғып, қонақ болды. Арнайы құрылған комиссия Семей станциясы, Локомотив ауылы, Семей вагон пайдалану депосы сынды жекелеген киіз үйлердің жабдықталуын жоғары бағалады. Айта кетейік, Семей станциясының теміржолшылар жеке үй тігіп, арнайы этнографиялық фотостудия әзірлепті. Бұл креативті бастаманың авторы станцияның бас инженері Бекзат Кәрімханов бұл жолғы мерекенің әсіресе жастар үшін тағылымдық, тәрбиелік мағынаға ие болуын көздегендерін айтады.  

Алаңның бір шетінде спорттық ойындардан сайыс өткізілді. Арқан тарту, кір тасын көтеру сынды іс-шаралардың жүлдегерлеріне арнайы тағайындалған мерекелік бағалы сыйлықтар тарту етілді. Бұл ойындарда қозғалыс ревизоры Ернұр Тұрсынбеков бастаған РБ-6 аппаратының жігіттері топ жарды. Осылайша биылғы наурыз жылдағы қалыптасқан дәстүрден өзгеше сипатта, ерекше көңіл күймен мейлінше думанды өтті.