Жамбылға жеті автокөлік келді
"Қазақстан теміржолшысы" газетінің Жамбыл облысындағы меншікті тілшісі
«Әскерилендірілген теміржол күзеті» ЖШС Тараз филиалында ерекше қуанышты оқиға орын алды. Күзет қызметінің бес атқыштар командасына жеті бірдей су жаңа Toyota Hilux көлігінің кілті табыс етілді.
Мамандардың айтуынша, жаңа автокөлік темір жолдағы әскерилендірілген күзет қызметін оңтайландыруға мүмкіндік беретіндей қазіргі заманға сай жабдықталған. Жол талғамайды, кез келген жерден іркілмей өте алады. Филиал директоры Еркін Мүсілімовтің айтуынша, «Қазақстан темір жолы» ҰК» АҚ басқарма төрағасы Талғат Алдыбергеновтің, «Әскерилендірілген теміржол күзеті» ЖШС бас директоры Нұржан Әлкеевтің қолдауымен күзет қызметінің техникалар базасы толықтай жаңартылып жатыр. Тараз филиалында бес жылдан бері автокөліктер паркі түгелдей дерлік жаңарды деуге болады.
– Барлық филиалдың техникалар базасындағы көліктер сарапталып, қай өңірге қанша жаңа көлік қажет екені ескерілгені анық. Бірер жыл бұрын біздің филиалға осындай модельдегі екі көлік бөлініп берілген. Ал бұл жолғы көлік – жаңа заманға, талапқа сай жабдықталған, модификацияланған сұраныстағы түрі. Toyota Hilux көлігінің басқа елдердің көлігіне қарағанда көп артықшылығы бар. Мысалы жылдамдығы, ұтқырлығы, лебедкасы, барлық жарақтандырылуы жағынан біздің қызметке ыңғайлы. Шу мен Түрксіб командасына екі-екіден, қалғанын Сарышаған, Тараз және «Шұғыл әрекет ететін» атқыштар командаларына тапсырдық, – дейді «Әскерилендірілген теміржол күзеті» ЖШС Тараз филиалының директоры Еркін Түгелбайұлы.
Техникалық базаны толықтырған су жаңа көлік 2025 жылғы сериясы екен. Еске сала кетсек, «ӘТЖК» ЖШС бойынша барлығы 78 жол талғамайтын Toyota Hilux автокөлігі сатып алынып, өңірлерге таратылып отыр. Бұл күзет қызметкерлерінің еңбек жағдайын жақсартуға, қызмет беделін арттыруға және теміржол саласының қауіпсіздігін одан әрі күшейтуге бағытталған. Сонымен қатар күзет қызметінің тиімділігі мен жедел әрекет ету мүмкіндігін едәуір арттыруға ықпал ететін болады.