Маңғыстауда жол табаны сауықтырылуда

Жаз – теміржол инфрақұрылымын сауықтыратын кезең. Бұл бағытта көктем басталғалы жұмысқа кіріскен түбек теміржолшылары Маңғыстау шойын жолының сапасын арттыру, өткізгіштік қабілетін жоғарылату бағытында біраз айтарлықтай шаруалар атқарып үлгерді.

Маңғыстау магистральдық желі бөлімшесі бойынша осы жылға жоспарланған жұмыстар наурыз айынан бастау алған. Бірінші кезекте күшейтілген орташа жөндеу жұмыстарына басымдық беріліп, бүгінгі күнге дейін он шақырымнан астам жол осы жөндеу түрінен өткізілді. Жұмысқа Ағадыр машиналандырылған жол дистанциясы филиалының техникалары жұмылдырылған. Аталған техникалардың күшімен Бейнеу жол дистанциясында станция басындағы жолдардың 7,730 шақырымы, Маңғыстау жол дистанциясында Шетпе станциясынан 3 шақырым жол қамтылып, күшейтілген орташа жөндеуден өткен. Бүгінде бұл жұмыстар Маңғыстау станциясында жалғасын тауып, мұнда да 3 шақырым жол жөндеуден өткізіліп, аяқталуға жақындады.  

– Биыл атқарылуы тиіс құрылыс-жөндеу жұмыстарының жобасын дайындап, күн жылына бастағаннан қарекетке кірістік. Күн-түн демей тынымсыз еңбектің нәти жесінде қазірге дейін біраз шаруаны шираттық. Сол наурыз айынан «Дуомат» жол машиналарының кешені күшейтілген орташа жөндеуден өткен жолдарда жолды қалпына келтіру жұмыстарын атқарып жүр. Ал «Унимат» машинасы жаңадан салынған бұрмаларды көтеру жұмыстарын жүргізуде. Сонымен қатар биыл жоспар бойынша Бейнеу жол дистанциясында – 4 дана, Маңғыстау жол дистанциясы аумағында 14 дана бағыттамалы бұрма ауыстырылады. Қазір осы жұмыстар да атқарылып жатыр. Малға қарсы қоршау тұрғызу мәселесі де қашанда өзекті. Бұл жұмыс жыл сайын атқарылады, осы жылы 56 шақырым қоршау саламыз. Соның 34 шақырымы ПЧ-12 Бейнеу дистанциясының, 22 шақырымы ПЧ-13 Маңғыстау дистанциясының аумағында бой көтереді. Бүгінде «Ямобур» техникасымен қоршаудың шұңқырын қазып, дайындап жатырмыз, – деп ақпар берді Маңғыстау магистральдық желі бөлімшесінің жол бөлімі басшысы Нұрлыбай Қисаев.  

Бөлім бастығының мәліметіне сүйенсек, биыл сонымен қатар түбек теміржолында 1151 шақырым аумақта малға қарсы қоршаулар қайта жөнделеді. Бұл жұмыстар да осы айда басталады. Бұлардың бәрі көктем мезгіліндегі атқарылуға тиіс жұмыстар, жаз мезгіліне де арнайы жоспар жасақталған. Жоспардың басында маусымға межеленген күрделі жөндеу тұр. Ол Күйкен бекетінен №2-3 бекет аралығындағы жалпы көлемі 32,167 шақырым жолды қамтиды.