Семейлік теміржолшылар қаржылық сауаттылығын арттыруда

«ҚТЖ» ҰК» АҚ-ның еншілес ұйымдарында «Amanat» партиясының бастамасымен республикалық «Қарызсыз қоғам» әлеуметтік жобасы жүзеге асырылуда.

Бұл жоба қызметкерлердің қаржылық сауаттылығын арттыруға, түптеп келгенде қарыз мәселелерін шешуде нақты көмек көрсетуге бағытталып отыр.  

Жоба онлайн және офлайн форматта жұмыс істейді. Қызметтер халыққа тегін ұсынылады. Жуырда партия филиалымен бірлескен меморандум аясында «ӘТЖК» ЖШС Семей филиалы қызметкерлері үшін арнайы семинар-тренинг өткізілді. Оның барысында барша қатысушылар жобаның қызметтерімен толық танысып, несиелік қарыздарды реттеу, қарыз картасын жасау, жеке бюджетті жоспарлау сынды бірқатар өзекті мәселелер кеңінен қарастырылды.  

– Жайсыз әлеуметтік жағдай теміржолшылардың көңіл-күйіне, ал ол өз кезегінде жұмыс істеу қабілеттеріне теріс әсер етері сөзсіз. Ал халықтың шектен тыс несие қарызына батуы – қоғамдағы ең өткір проблемалардың бірі. Сондықтан бұл әлеуметтік жоба өзекті мәселенің салдарымен де, себебімен де күресуге мүмкіндік береді. Мақсатымыз – қызметкерлеріміздің қаржылық сауаттылығын мейлінше арттыру, қаржыны басқара білу әдістерін меңгеруіне жәрдемдесу. Осындай семинар-тренингтерден олар мол мағлұмат, пайдалы ақпарат алып, дағды қалыптастыратыны анық, – дейді Семей ЖТ филиалы кәсіподақ ұйымының және бөлімше бойынша «Amanat» партиясы бастауыш ұйымының төрайымы Айгүл Берікболова.  

Қатысушылар қаржы мәселесі бойынша толғандырған сұрақтарын қойып, кәсіби маманнан нақты кеңестер алды. Аталмыш семинарларды алдағы уақыттарда желі бойындағы өзге де теміржол мекемелерінде өткізу ойластырылуда.