Маңғыстауда Транскаспий бағыты арқылы өтетін жүк тасымалы өсті
Маңғыстау облысы бойынша меншікті тілші
Маңғыстау магистральдық желі бөлімшесіне қарасты негізгі жолдардың пайдалану ұзындығы мың шақырымнан асып, сапалық көрсеткіштері де жақсарған. Бұл өз кезегінде жүк айналымының кедергісіз жүзеге асуына, артуына ықпал етіп отыр. Мәселен, биылғы төрт айдағы жүк айналымына назар аударар болсақ, жоспар артығымен орындалып, көрсеткіш 2 млн 580 мың тоннаға жеткен.
Жүк тиеу жұмыстары да қыс айларында сәл-пәл бәсеңдеп, жалпы жоспарды орындау 99 пайызды көрсеткенмен, сәуір айында нәтиже жақсара түскен. Өткен айда күніне 105 вагон тиеу жоспары артығымен орындалып, 127 пайызды көрсеткен. Жүк түсіру барысында да көрсеткіштер жоғары. Тәулігіне түбек теміржолына 267 вагон жүк түсірілген. Қалған көрсеткіштер де жүз пайыздың үстінде жүзеге асырылған.
Ақтау порты бойынша төрт айда 44 кеме жүк тиеліп, жіберілген. 143 мың тонна бидай тасымалданған. Ал Құрық портында 29 кеме жөнелтіліп, 101 мың тонна жүк шетел асқан. Ауа райының қолайсыздығына, 53 күн дауыл болуына қарамастан ауыстырып тиеу жұмыстары жалғасып, қорытындысы осылай жоғары деңгейге жеткен.
Транскаспийлік халықаралық көлік бағдары бойынша контейнерлік кемелер көбейіп, аталған мерзімде осы бағытпен 85 кеме жүк жөнелтіліп, 15 275 контейнер ауыстырып тиелген.
Құрық портынан 3218 вагон ауыстырып тиеліп, 253 мың тонна жүк тасымалданған. Портқа дейінгі станцияда ашылған жаңа терминалдың да жұмысы жандана түскен. Бұл нысан арқылы өткен жүктер көлемі былтырғыға қарағанда артып, он кеме осы жерден жөнелтілген.
Түбек теміржолының тасымалын арттырып отырған тағы бір нысан – қайта ашылғанына көп бола қоймаған Бейнеу астық терминалы. Аталған кәсіпорын бір ғана сәуір айында 21 вагон жүк түсірген. Төрт вагон тиеп, экспорттаған.
Жоғарыда атап өткеніміздей, жүк тасымалына әсер ететін алғышарттардың ең маңыздысы жолдың жағдайы мен күтіп ұсталуы болғандықтан түбектік теміржолшылар бұл бағытта да жұмыстарын жандандырып отыр. Қазірде магистральдық желі бөлімшесіне қарасты негізгі пайдаланудағы жолдардың 547,1 шақырымы ПЧ-12 Бейнеу, 533,6 шақырымы ПЧ-13 Маңғыстау жол дистанцияларына тиесілі. Бұл аталған жолдарда бағыттамалық бұрмалар саны 690 жиынтыққа, теміржол өткелдерінің саны 60-қа жеткен. Жүзден астам темірбетонды көпірлер мен бес жүзге жуық темірбетонды құбырлар қызмет көрсетіп тұр.
Биыл бөлімше жолдарының біраз бөлігінде өткізу сапасы тағы да жақсаратын болады. Куйкен – Бекет 2 – Бекет 3 аралығында 32,167 шақырым жол күрделі жөндеуден, станциялық жолдардың 16,984 шақырымы күшейтілген орташа жөндеуден өткізіледі деп жоспарланған. Бағыттамалық бұрмаларды 16-сын жаңасымен ауыстыру, 56 шақырым жолға малға қарсы қоршау салу, мың шақырымнан астам аумақтағы қоршауларды жөндеу межесі қойылған.