Шекарамаңы ынтымақтастығы нығаюда
"Қазақстан теміржолшысы" газетінің Жамбыл облысындағы меншікті тілшісі
«Қазтеміржолкәсіп» ҚБ Жамбыл филиалының ұйымдастыруымен Тараз қаласында «Қазақстан және Қырғызстан Республикасы теміржолшылары кәсіподақтарының шекарамаңы ынтымақтастығы» тақырыбында семинар өтті.
Теміржолшылар кәсіподағының республика көлемінде қолға алған бастамалары мен қол жеткізген жетістіктері Жамбыл филиалының жұмыс тәжірибесі арқылы жанжақты көрініс тапты.
Семинардың ашылуында «Қазтеміржолкәсіп» ҚБ Жамбыл филиалының төрағасы Ерболат Жидебаев ауқымды іс-шараның мәні мен маңызына тоқталды. Кәсіподақтардың әріптестік байланысын нығайту, өзара тәжірибе алмасуды көздеген екі күндік іс-шараға Жамбыл бөлімшесіндегі бастауыш кәсіподақ ұйымдарының төрағалары мен Қырғыз елінен келген бір топ делегация қатысты.
«Қазтеміржолкәсіп» ҚБ төрағасының кеңесшісі Жұпарбек Сәбитов, «Қырғызпрофсож» төрағасының орынбасары Нургазы Нусубалиев теміржолшылар кәсіподақтарының шекарамаңы ынтымақтастығы туралы сөз қозғап, мұндай семинар алғаш рет өткізіліп отырса да, екі ел арасындағы бауырластық, әріптестік байланыстардың тамыры тереңде жатқанын атап өтті.
Жұпарбек Абзалбекұлы 120 жылдық тарихы бар теміржолшылар кәсіподағының еңбек қауіпсіздігі және еңбекті қорғау жөніндегі заңдардың шеңберінде жұмыс берушілер мен жұмысшы арасындағы құқықтық-әлеуметтік мәселелердің шешімін табуға қалай қол жеткізгенін нақты мысалдармен түсіндірді. Ал Нургазы Эсенбекулы «Қытай – Қырғызстан – Өзбекстан» темір жолы құрылысының ішкі жол учаскелерін дамытуға ықпал етіп отырғанын атап өтіп, биыл Кочкор станциясы пайдалануға берілетінін, бұл кәсіподақ ұйымының жауапкершілігін арттыра түсетінін жеткізді.
– Қазақстан және Қырғызстан Республикасы теміржолшылары кәсіподақтарының арасындағы ынтымақтастықты арттыру үшін екі елдің салалық кәсіподақтарының төрағалары жыл басында Меркі жерінде кездесті. Онда Шекара маңындағы ынтымақтастық туралы Меморандумға қол қойылды. Ал бүгінгі ауқымды іс-шара – осы екіжақты келісімнің, достық, іскерлік қарым-қатынастың айшықты жалғасы. Біз осы семинарды ұйым- дастыру арқылы құрмет, теңдік, тату көршілікті, екі елдің кәсіподақтарының шекаралас аймақтардағы ынтымақтастығын арттыруды көздеп отырмыз, – дейді «Қазтеміржолкәсіп» ҚБ Жамбыл филиалының төрағасы Ерболат Жидебаев.
Екі күнге созылған семинардың бағдарламасы маңызды тақырыптарды қамтыды. Екі тарап өздерінің кәсіподақ ұйымдарының жұмысын ұйымдастыру және үйлестірудегі тәжірибелерімен бөлісті. «Қазтеміржолкәсіп» ҚБ Жамбыл филиалы төрағасының орынбасары Еркін Утешов филиал құрылымына, Қазақстан Республикасының кәсіподақтары туралы заң актілеріне тоқталып, кәсіподақ ұйымының жұмыс берушілермен жасасқан «Ұжымдық шарт» шеңберінде қандай мүмкіндіктерге қол жеткізілгенін айтып берді. Мемлекет кәсіп одақтарды қалай қорғайтынын қозғады. «Қырғызпрофсождың» бас әдіскері Мира Керимбаева қазіргі таңда 39 бастауыш ұйымды қайта құрылымдау арқылы саннан сапаға көшу жоспарланып отырғанын атап өтті.
Көрші қырғыз елінде теміржолшылар кәсіподақтарының қаржылық қызметінде бірқатар айырмашылықтар бар екен. «Қырғызпрофсож» бас бухгалтері Маргарита Наумова кәсіподақтар федерациясынан берілетін пайыздық үстеме 2020 жылдан бері тоқтап қалғанын, қаржыландыру мүшелік жарна арқылы ғана жүретінін айтты.
Семинардың екінші күніндегі бағдарлама ашық диалог форматында өрбіп, екі тараптың қатысушылары кәсіподақтарға ортақ мәселелерді талқылады. Ынтымақтастықты арттыру жөніндегі ұсыныстарымен бөлісті. Қырғыз елінен келген қонақтар осындай маңызды әрі ауқымды іс-шараны ұйымдастырғаны үшін ризашылықтарын жеткізді.