Қандыағаштық теміржолшы ірі апаттың алдын алды

Қандыағаш вагон пайдалану депосының вагон қараушысы Нұрбек Қарағұнанов қырағылығының арқасында ірі апаттың алдын алды. Күнделікті қызметтік міндетін атқарып жүрген теміржолшы жүк вагонындағы роликті буксаның қауіпті ақауын дер кезінде анықтап, ауыр зардаптарға жол бермеген.

Оқиға қыс мезгілінде болды. Қандыағаш станциясына кезекті жүк пойызы тоқтаған сәтте вагондарды тексеру жұмысы басталған. Нұрбек цистерна вагондарының доңғалақ жұбын балғамен ұрып келе жатып кенет күмәнді тосын дыбысты байқап қалады.  

«Дереу анықтап қайта ұрып, роликті буксаның айналасын мұқият қарап, сақинасы (кальцосы) шығып кеткенін анықтадым. Қақпағын ашып қарағанда ішкі бөлшектерінің шашылып жатқанын көрдім», – дейді ол.  

Әрі қарай алгоритм бойынша әрекет етіліп, ақау жайлы басшылыққа хабар беріледі. Әріптестері келіп тексеріп, вагонды мұқият қарап шыққан соң жылжымалы құрамнан ағыту жөнінде шешім қабылданады. Вагонның деректері жазылып, акт толтырылады. Кейін жөндеу және қалпына келтіру жұмыстары жүргізіледі. Ақау дер кезінде анықталмағанда салдары өте ауыр жағдайға ұласуы әбден мүмкін еді. Өйткені цистерна ішіндегі сұйықтық сыртқа төгілсе, экологиялық апат орын алып, қоршаған ортаға зор зиян келтіретін еді.  

Нұрбек – теміржолшылар әулетінің өкілі. Әкесі өмір бойы вагон қараушы болып еңбек еткен. Әкесінің ағалары мен бауырлары да теміржол саласында ұзақ жылдар қызмет атқарған. Сондықтан бұл мамандық оған бала күнінен етене таныс. Сонымен қатар қырағылық теміржолда басты қасиет екенін, әсіресе вагон қараушы үшін ол кәсіби қасиет екенін жақсы түсінеді.  

Әр күн бірдей өткендей көрінгенімен, әртүрлі жағдайлар кездеседі. Қандыағаш станциясына келген жүк вагондарын түгел тексереді. Бір ауысымда 8-9 пойыз өткізеді. Әр пойызда орта есеппен 50-70 вагон бар. Күніне жүздеген вагонды қарап шығады. 12 сағат бойы аяқпен жүріп, тыным таппайды. Пойыздар үздіксіз келіп-кетіп жатқан үлкен станцияда демалыс деген жоқ. Тек ауысымнан шығып, арқаны кеңге салып демалуға болады. Қырағылық пен жауапкершілік әр маманның кәсіби келбетін айқындайтын салада Нұрбек Қарағұнанов сынды теміржолшылар үшін бұл – жазылмаған заңдылық.