Шымкентте теміржолшы өнертапқыштардың қатары артып келеді

Шымкент магистральдық желі бөлімшесінің рационализаторлық қызмет бойынша көрсеткіштері көңілден шығады. Өткен жыл біздің өнертапқыштар үшін табысты жыл болды деуге болады.

Жоспар бойынша өткен жылы 17 рационализаторлық ұсыныс беру жоспарланған болса, нақты орындалуы 27 ұсынысты құрып, жоспар артығымен орындалды. Яғни жоспардан тыс 10 ұсыныс болды. Бұл – шымкенттік теміржолшылар арасында озық ойлы өнертапқыштар артып отырғанының белгісі.

Өткен жылдың қорытындысы бойынша Астана қаласында 26 мамыр күні өткен «Рационализаторлық – техникалық дамудың негізі» атты конференцияда жаңа жобаларын қорғағандар қатарында Шымкент магистральдық желі бөлімшесі директорының пайдалану жөніндегі орынбасары Жомарт Мырзабеков, Арыс өрт сөндіру пойызының бастығы Есқара Әлімжан, ШЧ-38 Арыс филиалының бастығы Мейіржан Жанабаев, байланыс электромеханигі Вали Абдулхусенов, т.б. болды. Рационализаторлар конференциясына «ҚТЖ» ҰК» АҚ бас инженері Рамазан Садырқұлов пен ЦНТИ бас директоры Төлеген Орашев қатысып, өнертапқыштардың еңбегімен танысты, лайықты бағасын берді.  

Шымкент бөлімшесінің рационализаторлық жобалары конференция қорытындысы бойынша жүлделі орындарға ие болды, атап айтқанда «Үздік рационализатор» төсбелгісін алған Жомарт Сырлыбайұлының «Жұмыс орнына пойыз жақындағанын ескертетін тасымалды хабарлау жүйесі» жобасы – 2-орынды, ал Арыс өрт сөндіру пойызының бастығы Есқара Әлімжанның «Қолдан жасалған лафеттік су атқыш» жобасы 3-жүлделі орынды иеленіп, еңбектері жоғары бағаланды. Олардың өндіріске ұсынған жобалары экономикалық жағынан тиімді деп танылды.  

Ләззат ЖАРИМБЕТОВА, Шымкент