Күрделі жөндеу – кәсібилер қолында
Қызылорда облысы бойынша меншікті тілші
Қызылорда өңірінде теміржол инфрақұрылымын жаңғырту жұмыстары қарқынды жалғасуда. «Integra Construction KZ» ЖШС филиалының Батыс дирекциясы ағымдағы жылға жоспарланған күрделі жөндеу ді табысты жүзеге асыруда.
Биыл жол жөндеуші мекеме тарапынан облыс аумағында жалпы ұзындығы 31,316 км теміржолға күрделі жөндеу жүргізу көзделген. Бүгінде Байқожа мен Еңбекшіқазақ станциялары аралығындағы 17,988 км тақ жол және Төретам мен Диірментөбе станциялары аралығындағы 13,328 км жұп жол жаңғыртудан өтуде.
Теміржолдың ескі жолтабан құрылымдары жаңартылып, жаңа темір-бетон шпалдар төселуде. Сонымен қатар ұзындығы 1500 метрлік ұзын рельстер орнатылып, жолдың техникалық сапасы мен пайдалану мерзімін арттыруға ерекше мән беріліп отыр. Мамандардың айтуынша, негізгі күрделі жөндеу жұмыстары тамыз айының екінші онкүндігінде толық аяқталады деп жоспарланған.
Құрылыс алаңында 45 жұмысшы, 30-ға жуық механизатор, 6 орта буын басшылар еңбек етуде. Сондай-ақ МПД, ПЛ, УК, ЭЛБ, ВПО секілді ауыр жол техникалары, 120 қиыршық тас тасымалдайтын вагон, рельс-шпал торларын жеткізетін арнайы жылжымалы құрамдар жұмылдырылған. Бұған қоса 5 бульдозер, 2 автогрейдер және 5 автотехника құрылыс қарқынын үдетуде.
Батыс филиалының бастығы Дәурен Сұлтамұратовтан бөлек ұйымдастыру және үйлестіру жұмыстарына филиал директорының орынбасары Әмірхан Жолдасбай мен прораб Берік Арықбай жетекшілік жасап келеді. Олардың кәсіби тәжірибесі мен ұйымдастырушылық қабілеті күрделі жөндеу жұмыстарының белгіленген мерзімде әрі сапалы орындалуына негіз болып отыр.
– Алдағы уақытта Сексеуіл станциясын дамыту жобасы аясында ауқымды құрылыс жұмыстары қолға алынбақ. Жоба бойынша станцияның «А» және «Б» парктері кеңейтіліп, қосымша 17 станциялық жол салынады. Жалпы ұзындығы 20 км құрайтын жаңа жолдармен қатар 77 бағыттама бұрмасын орнату жоспарланған. Қазіргі таңда биылға жоспарланған 31,316 км күрделі жөндеудің құрылыс жұмыстары жоспарға сәйкес жүргізілуде, – дейді филиал директорының орынбасары Әмірхан Жолдасбай.
Сыр өңірінің аптап ыстығы мен қатал ауа райына қарамастан құрылысшылар жұмысты тоқтатпай еңбек көрігін қыздыруда. Кәсіби шеберлік пен қажырлы еңбектің арқасында өңір теміржолының жаңа тынысы ашылып, қауіпсіз әрі заманауи инфрақұрылым қалыптасуда.