Жамбыл жырларын жатқа оқыды
"Қазақстан теміржолшысы" газетінің Жамбыл облысындағы меншікті тілшісі
Жамбыл магистральдық желі бөлімшесінде Жамбыл Жабаевтың 180 жылдығына орай «Еңбек пен бірліктің жыршысы – Жамбыл» атты танымдық-мәдени іс-шара өтті.
Бөлімше директоры Асқар Жексенбиевтің басшылығымен, жетекші аудармашы Ақерке Үтепбергенованың ұйымдастыруымен топтық байқау форматында өткен іс-шарада теміржолшылар жыраудың жырларын жатқа оқыды. Қатысушылар ақынның өмірі мен шығармашылық мұрасын насихаттап, сұрақ-жауап, интерактивті жарыстар кезеңінде интеллектуалдық әлеуеттері жоғары екенін көрсетті.
– Командалық жарыстың тиімді тұсы – ұжымның ішкі ауызбіршілігін нығайтуы. Конкурста олар бір-біріне көмектесіп, демеуге ұмтылады. Сондықтан, байқауды жеке қатысушылар емес, топтар арасында өткіздік. Бұдан бөлек барлық қызметкерлер арасында интеллектуалдық жарыс ұйымдастырылды. Оған қатысқан 70-тен астам мамандар арасында белсенділер көп болды, – дейді Ақерке Серікбайқызы.
– Байқауда «Жамбыл жалындары» командасының топ басшысы, Тараз станциясындағы техникалық қызмет көрсету орталығының вагон қараушысы Жамбыл Айтуовтың ерекше көзге түскенін атап өту керек. Жамбылдай болсын деп ата-анасы ырымдап есімін Жамбыл қойған әрі өнерден қаражаяу емес екенін көрсеткен ол байқауда ұжымның сенімін ақтап, жүлдегер атанды, – дейді депоның кадр маманы Қымбат Ақжолова.
Командалар арасында Жамбыл ЖТ командасы 1 орын алса, Айсар Әлішевтің табандылығымен Жамбыл магистральдық желі бөлімшесі тобы 2 орыннан көрінді. «Тараз өңірлік қызмет көрсету орталығы» командасы 3 орынды қанағат тұтты.