Өткелдердің техникалық жай-күйі жіті бақылауда

Семей магистральдық желі бөлімшесі бойынша жаз мезгіліндегі теміржол инфрақұрылымдарының күтімі мен жөндеу жұмыстары қарқын алды. Жоспарлы іс-шаралар аясында бөлімшеге қарасты көптеген теміржол өтпелерін жаңғырту мен жаңалау да бар.    

Мәселен, Семей қаласы аумағында орналасқан 37 теміржол өткелінің техникалық жай-күйіне жүргізілген көктемгі комиссиялық тексеру барысында бірқатар кемшілік анықталған-ды. Соның аясында бүгінде жергілікті жол дистанцияларының арнайы бригадасы жүргіншілер қозғалысы жиі аумақтардағы жол өтпелерін жаңалауда.

– Теміржол өткелдерінің техникалық талаптарға сай болуы пойыздар қозғалысының қауіпсіздігін қамтамасыз етудегі маңызды факторлардың бірі. Алайда тексеру барысында бірқатар өткелде асфальт-бетон жамылғысының тозғаны, өткел төсемдерінің ақауы және ағымдағы жөндеу жұмыстарын жүргізу қажеттігі  анықталған болатын. Бұл автомобиль көліктерінің қауіпсіз қозғалысына кері әсерін тигізеді. Осы орайда телім бойындағы бірқатар жол өтпелері қайта жаңарды. Тұрғындар әлеуметтік желілерде алғыстарын білдіруде, – дейді бұл орайда ПЧ-39 мекемесінің техникалық бөлімінің мамандары.

Жалпы, қаладағы автокөлік ағынының ұлғаюына байланысты бірқатар теміржол өткелдеріне түсетін жүктеме де артып келеді. Сол себепті жекелеген нысандарда орташа және ағымдағы жөндеу жұмыстарына талап күшейтілуде.  

Бұл орайда, ПЧ-39 мекемесінің бас инженері Мырзабек Керейбаевтың айтуынша, қысқы кезеңге дайындық аясында теміржол өткелдерінің техникалық жай-күйін жақсарту шараларына бірінші кезекте күш салынған. Соның ішінде әсіресе жаяу жүргіншілер өткелдерін жаңалауға айрықша басымдық берілуде. Мәселен, Семей жол дистанциясының жолшылары қала ішіндегі орталық базар аумағындағы 4 өткелді бір ауысым ішінде ағымдық жөндеуден өткізіп шықты. Оның сыртында ескертпе белгілер де жаңаланып, бірқатар нысандарға жаңадан орнатылды. Осы бағытта ПЧ-39 және Жаңа-Семейдегі ПЧ-40 жол дистанциялары өткел төсемдерін ауыстыру және жол жабындысын қалпына келтіру жұмыстарын жоспарға сәйкес бастап, межелі мерзім ішінде аяқтамақ.

Жалпы, өткелдердегі қозғалыс қауіпсіздігін қамтамасыз етуге бағытталған іс-шараларды күшейту қажеттілігі туып тұр. Мәселен, жаяу жүргіншілердің орталық базар аумағындағы белгіленбеген жерден өтуі себепті өткен жылы бір, биыл 6 айда екі өлімге әкелген адам басу фактісі тіркеліп отыр.  

Биылғы жазғы жол сауықтыру ісіндегі мақсат айқын – теміржол өткелдерінің техникалық жай-күйін нормативтік талаптарға сәйкестендіру. Ол пойыздар қозғалысының қауіпсіздігін қамтамасыз етудің және жол-көлік оқиғаларының алдын алудың басты шарттарының бірі. Сондықтан бұл бағыттағы жұмыстар желі бойындағы жауапты мекемелердің тұрақты бақылауында болады.