Ақтөбе облысында жөндеуден кейін Жем вокзалы қайта ашылды
Ақтөбе облысында 1905 жылы салынған Жем станциясының вокзалын қайта жаңарту аяқталды, деп хабарлайды Rail-news.kz.
Жұмыстар Мемлекет басшысының тапсырмасы бойынша іске асырылып жатқан еліміз теміржол вокзалдарын жаңғырту бағдарламасы шеңберінде жүргізілді.
Қайта құру барысында вокзалдың бір қабатты ғимараты жаңартылып, оның ауданы 387,5-тен 421,2 шаршы метрге дейін ұлғайтылды. Қасбет, ішкі үй-жайлар, инженерлік жүйелер мен инфрақұрылым элементтері жаңартылды.
Қасбеті заманауи фиброцемент тақталармен қапталған. Ішінде әрлеу жұмыстары жүргізіліп, аспалы төбелер орнатылды және еден жабындары жаңартылды. Қайта құру кезінде керамогранит, сырғымайтын керамика және модульдік винил тақталары қолданылды. Материалдардың негізгі бөлігі Қазақстанда өндірілген.
Жаңарту жолаушылар мен теміржол қызметкерлерінің жағдайын жақсартуға, жайлылық пен қауіпсіздік деңгейін арттыруға, сондай-ақ тарихи ғимараттың сыртқы келбетін жаңартуға мүмкіндік берді.
Бүгінгі таңда вокзалдың орташа тәуліктік жолаушылар ағыны шамамен 332 адамды құрайды. Станция арқылы Жемді Ақтөбе, Астана, Алматы, Қарағанды, Тараз, Шу, Түркістан, Шымкент, Қызылорда және Қазалымен байланыстыратын 24 жолаушылар пойызы өтеді. Сондай-ақ, пойыздар Ресей, Өзбекстан, Тәжікстан және Қырғызстанға қатынайды.
Жоба Қазақстан Республикасы Үкіметінің, Көлік министрлігінің, «Самұрық-Қазына» АҚ және Ақтөбе облысы әкімдігінің қолдауымен «Қазақстан темір жолы» ҰК» АҚ-ның өз қаражаты есебінен іске асырылды.
