Жаңаөзен вокзалында ардагерлер бұрышы ашылды

Маңғыстау аймақтық теміржолшы ардагерлер кеңесі өлке теміржолына еңбегі сіңген кешегі аға буынның есімін ұлықтап, ұрпақ жадында қалдыруды бүгінгі ұрпақтың алдындағы парыз санайды. Жуырда Жаңаөзен вокзалында үш теміржолшы ардагерге арналған бұрыш ашылды.

Вокзал ғимаратынан орын бөлінген үш ардагердің бірі Байбол Орақов – 1900-1987 жылдары өмір сүрген, тек Маңғыстаудың ғана мақтанышы емес, бүкіл КСРО шеңберінде қолтаңбасы қалған «Құрметті теміржолшы» атанған тұлға. ҰОС жылдары броньмен қалып, Түркіменстан теміржолында еңбек еткен. 1944 жылы «Құрметті теміржолшы» белгісі мен «Еңбектегі ерлігі үшін» медалімен мараппаттаған. 1955 жылы КСРО Жоғарғы Кеңесінің Жарлығымен соғыс және одан кейінгі жылдардағы жанқияр еңбегі үшін «Еңбек Қызыл Ту» орденін алған. Сол жылы өзінің туып өскен түбегіне оралып, балаларын тарихи Отанымен қауыштырған.  

Екінші ардагер – 1944 жылы Түркіменстанда туып, 1995 жылы дүниеден өткен Балтабай Нахов. Ол 1968 жылы Жаңаөзеннің Теңге ауылына қоныс аударып, теміржолда жол монтері болып жұмысқа кіріседі. Көп уақыт өтпей бригадир, сосын жол шебері болып ұзақ жыл адал еңбек етеді. 1993 жылы «Құрметті теміржолшы» төсбелгісіне ие болады.  

Үшінші ардагер Жұма Сүйіндіков – 1930 жылы туған, бар балалық шағын сұм соғыс ұрлаған ұрпақтың өкілі. Бұғанасы қатпай жатып 11-12 жасында еңбекке араласып, 15-16 жасында тепловоз машинисінің көмекшісі курсын бітіріп, теміржолда жұмыс істей бастаған. 1966 жылы Маңғыстауға көшіп келіп, түбек теміржолының алғашқы кірпіштерін қаласқан. Содан 1996 жылға дейін тапжылмай еңбек етіп, бірнеше буын тәрбиелеп өсіріп, барша маңғыстаулық машинистердің ұстазына айналған жан бүгінде көзі тірі, 96 жаста.  

– Міне, түбек теміржолының мақтанышы болған осынау ардагерлеріміздің өнегелі өмір жолын болашақ ұрпақ біліп өссін деген ниетпен осы белгілерді орнатып отырмыз. Бұл кісілердің бәрі – кезінде көршілес Түркіменстан теміржолында еңбек жолын бастап, түбекке теміржол тартылған алпысыншы жылдардың ортасында елге оралып, қалған өмірлерін отандық теміржолдың дамуына сарп еткен тұлғалар, – дейді Маңғыстау аймақтық теміржолшы ардагерлер кеңесінің төрағасы Үсен Имашев.