Бұлан Семей теміржолшыларды әуреге салды
Абай облысы бойынша меншікті тілші
Семей теміржол вокзалы аумағында бұрын-соңды тіркелмеген ерекше жайт орын алды. Негізінен ну орманды мекен ететін бұлан жергілікті теміржолшыларды біршама әуреге салды.
Түз тағысының рельс бойымен үркектеп, желе жортып келе жатқанын ең алдымен ПЧ-39 мекемесінің жолшылары байқап, тәртіп сақшылары мен орманшыларға хабар берген екен. Себебі, бұғы тұқымдастарға жататын, дене тұрқы ірі жануар станция басындағы қозғалысқа кедергі келтірген болатын. Алайда ешқандай құралсыз келген полиция мен аң шаруашылығының мамандары, теміржолшылар көмекке келсе де, бұланды ұстай алмады. Орғып секірген үркек аң вокзал алаңындағы ғимараттар арасына кіріп, әуре-сарсаңға салды. Осы маңайдағы «Транстелеком» АҚ Семей филиалына тиесілі байланыс кабельдерін үзіп, қызмет барысында біршама қолайсыздықтар да тудырды.
– Тағыны ұстау мүмкін болмады. Тіпті, терезені сындырып, жабық ғимараттың ішіне кіргенмен де, жанына жақындай алмадық. Бұл жабайы аң Қызыл кітапқа енгізілген, қорғауға алынған екен. Ауыр ентіккеніне қарағанда қала ішіне рельс бойымен я пойыздан үркіп кірген немесе браконьерлерден бас сауғалап келсе керек. Оқыс жағдай туындамағанмен, бұлан үзген кабельдерді жөндеуге шамамен 15-20 минут уақыт кетті. Жедел жеткен механиктерімізге бұл жұмыс қиындық тудырған жоқ, – дейді оқиға куәгері, «Транстелеком» АҚ Семей филиалының қорғау-түсіндіру жұмыстары бойынша инженері Данияр Мұратов.
Осылайша, түз тағысы ұстатпаған күйі рельс бойымен жөніне кете барыпты. Алайда, теміржолшылар ол жайында «жүк пойызынан кездейсоқ түсіп қалған екен» деген қауесетті жоққа шығарды.