Семей теміржолшылары сақтыққа шақырды
Абай облысы бойынша меншікті тілші
Семей теміржолшылары теміржол өтпелеріндегі қауіпсіздік бойынша ерекше акция өткізді. Жол полициясының қатысуымен ұйымдастырылған профилактикалық шараға, әсіресе бөлімшеге қарасты жол дистанциялары белсенді қатысты.
Акция барысында бөлімше бойынша барлық теміржол өткелдері назарға алынып, ондағы жол-қозғалыс ережелерінің сақталу барысы қадағаланды. Бұл ретте жол полициясымен бірге арнайы рейдке шыққан теміржолшылар бірқатар ереже бұзушылықтарға да куә болды. Атап айтсақ, жол өтпесіне таяу арадан жолаушыларды түсірген қоғамдық көліктер мен жүргізушілер жол сақшылары тарапынан әкімшілік жазаға тартылды. Ал, теміржолшылар оларға жол өтпесінде ережелерді сақтау туралы арнайы жадынамалар таратты.
– Теміржол өтпелерінде шұғыл тежеу мен жарақат алу немесе түрлі қайғылы оқиғалардың алдын алу үшін автокөлік жүргізушісі шлагбаум алдындағы жол қозғалысы ережелерін жатқа білуі тиіс. Біз таратқан жадынамаларда ережелердің барлығы жазылған, жүргізушілерден оны қатаң сақтау талап етіледі, – дейді ПЧ-39 бас инженері Мырзабек Керейбаев.
Сонымен қатар, жолшылар жол өтпесіндегі бағдаршамның қызыл түсіне тоқтаған жүргізушілермен әңгімелесіп, олардың жауапкершілігі мен осынау аумақтарда туындаған апаттық жағдайлардың салдары жайлы да сөз қозғап үлгерді. Сондай-ақ, еліміз бойынша теміржол өтпелеріндегі қайғылы жағдайлар жайлы статистикалық мәліметтермен де бөлісті. Бұдан өзге жол өткелдеріндегі кезекшілердің жұмыс орындары, белгі беру құрылғылары да тексеруден өтті.
Әйткенмен, дәл осы акция аясында тосын жайт орын алған. Таңғы 4:30 шамасында қала ортасындағы күзетілетін теміржол өткелінде жеңіл көлікке мінген жастар өтіп бара жатқан тепловозға соғылған. Жеңіл жарақат алғандардың ішімдік ішкені анықталды. Олардан ендігі аралықта бүлінген тепловоз үшін сот арқылы шығын өндіріліп алынбақ.
Айта кетейік, бүгінгі таңда Семей жол дистанциясы бойынша 37 жол өтпесі болса, оның қала ішіндегі төртеуі күзетіледі.