Астық тасымалы: вагон паркі жеткілікті
Шымкент қаласы бойынша меншікті тілшісі
Шымкент қаласында астық пен ұн тасымалына қатысты жиын болып өтті. «Қазақстан темір жолы» ҰК» АҚ бастамасымен өткен кеңеске Түркістан облысындағы астық өндіруші, ауыл шаруашылығы кәсіпорындарының, көлік компанияларының басшылары қатысты.
Түркістан облысы кәсіпкерлер палатасы өкілінің төрағалығымен өткен жиында негізінен Шымкент ЖТ бөлімшесінің клиенттері болып табылатын кәсіпкерлер мүддесі ортаға салынып, биылғы жаңа егін науқанына байланысты ұн және астықты теміржол көлігімен тасымалдауды дер кезінде қамтамасыз ету мәселесі талқыланды.
Бәрімізге белгілі, Қазақстанның астық өнімдерінің қатты түрлеріне Еуропа мен Азия нарығында сұраныс көп. Осыған орай, ҚТЖ өкілдері оңтүстіктегі кәсіпкерлермен кездесіп, биыл егін науқаны кезінде тасымалдауда қай бір жылдардағыдай вагон жетіспеу шілігі сынды мәселелер туындамас үшін алдын ала кеңесу үшін бас қосты.
«ҚТЖ биыл астық және ұн тасымалдау жоспарын ертерек бекітіп, осы жоспар аясында Солтүстік Қазақстан облысы, Қостанай, Көкшетау қалаларында алқалы жиын өткізіп, енді сіздердің алдарыңызға келіп отырмыз. Астық тасымалдау шаралары бойынша кәсіпкерлермен, мемлекеттік ұйымдармен, көршілес мемлекеттермен сөйлесіп, вагондармен жеткілікті қамтамасыз ету жайын шештік.Тасымалдау бойынша статистикаға келер болсақ, елімізде 2018-2019 жылдары рекордтық көрсеткіш орын алып, 11 млн 200 мың тонна астық тиелді. Оның 8 265 тонна немесе 75 пайызын экспорт тасымалы құрайды. Экспортқа шығарылатын астықты негізгі тұтынушы елдер – Орта Азия, Өзбекстан, Тәжікстан, Түрікменстан т.б. Астық тасымалы Ауғанстан мен Өзбектанға төмендегенін де айта кеткен жөн», – деді жиында сөз алған «ҚТЖ» ҰК» АҚ Тасымалдарды жоспарлау жөніндегі атқарушы директоры Нұржан Келбұғанов.
Ауыл шаруашылығы министрлігі айтқандай, биылғы астық былтырғы жылдан кем болмайды. Сол себепті, астық пен ұн тасымалы бойынша екінші жартыжылдықта 4.5млн тонна астық тиеледі деп күтіледі, сонымен ай сайн 450 мың тонна ұн арту күтіліп отыр. Тасымалды 1 млн 100 тоннаға жеткізу үшін 8 500 вагон жеткілікті көрінеді.
«Айта кеткім келіп отыр, бізде вагон паркі жеткілікті, ұн тасымалдауға арналған 13 мың жабық вагон бар. Оның ішінде 8000 ҚТЖ-да, қалған 4900 – жекеменшіктегі вагондар. Астық таситын қорда 9060 бірлік вагон бар, өзге жекеменшік компаниялар 2500 вагон ұсынғалы отыр. Яғни, биыл вагондар паркі екі есеге ұлғайды.
Сондай-ақ, оңтүстік өңір кәсіпкерлеріне тасымалдауға қатысты қандай да бір мәселе туындаса да ҚТЖ сайтындағы жұмыс тобына хабарласу ескертілді. Қысқасы, теміржолдың астық тасымалдауға дайын екені баса айтылып, кәсіпкерлердің астық тиеуді өз уақытында жүзеге асырулары өтініш етілді.
Осы орайда, астық тасымалы бойынша вагон жөнелтуде кептеліс тудырмайтын арнайы бағыттардың кестесі де жасақталғанын айта кеткен жөн. Пойыз жылдамдығы тәулігіне 800-850 км тасымалдауды қамтуы қажет. ҚТЖ өкілдері вагондардың айына кем дегенде екі рет астық тасымалдауы керектігін құлаққағыс етті. Өткен жылы Өзбекстан тарапымен жүк өткізу барысында кептеліс туындаған. Биыл Өзбекстан мен Сарыағаш, Келес арқылы қозғалыс 23 пойыздан 28 пойызға дейін артып, қосымша 8 маневр локомотиві бөлінетіні де мәлім болды.