Семейлік теміржолшылар «Бейбітшілік» акциясына қатысты
Абай облысы бойынша меншікті тілші
29 тамыз күні семейлік теміржолшылар Семей қаласында, Ертіс өзеніндегі Бейбітшілік аралында өткен «Невада-Семей» антиядролық қозғалысының 30 жылдығына арналған халықаралық «Бейбітшілік» акциясына қатысып, әлемнің бейбітсүйгіш қауымына үн қосты.
Осыдан тұп-тура 30 жыл бұрын тұңғыш рет еліміз бойынша ядролық сынаққа қарсы қозғалыс құрылса, 28 жыл бұрын Елбасының жарлығымен әлемдегі ең ірі Семей ядролық полигоны жабылған болатын. Содан бері, бұл атаулы күн жергілікті теміржолшылар үшін үлкен маңызға ие.
Халықаралық митингіге Семей ЖТ бөлімшесі басшысының орынбасары Ерғазы Жұмаділов бастаған 200-ден аса теміржолшылар қатысып, әлемнің әр түкпірінен жиналған бейбітшілік сүйгіш қоғам қайраткерлерімен бірге үн қосты.
– Кешегі 40 жыл ішінде полигонда 456 ядролық сынақ өткізіліп, ең кемі 500 мың адам радиация зардабын тартқан болатын. Олардың арасында теміржол бойымен «аса құпия жүк» – атом реакторлары мен ядролық зарядтарды тасымалдаған теміржолшылар да болды. Себебі, бұл қызмет радиациялық қауіптіліктің аса жоғары деңгейінде жүзеге асырылды. Бұл күн тек біз үшін емес, әлемдегі барша адамзат үшін елеулі күн саналады, – дейді аталмыш бейбітшілік акциясына қатысушы теміржолшылар.
Шаһардағы өзге де көптеген мекемелер мен ұйымдар мүшелері қатарында сала қызметкерлері де халықаралық ядролық қаруға қарсы іс-қимыл шараларын қолдайтындықтарын білдіріп, кешегі полигон зардабы мен құрбандарын бір минут үнсіздікпен еске алды.
Митингіге қатысушы теміржолшылар ядролық қарусыз әлем құру туралы БАҚ өкілдеріне сұхбат беріп, «Өлімнен де күшті» монументіне гүл шоқтарын қойды.