Мал басу фактісі азайған

Арыс жол дистанциясының берген мәліметі бойынша, биыл теміржолдарда бірде-бір рет мал басу оқиғасы тіркелмеген. Десе де, бұл жолда қараусыз жүрген мал жоқ дегенді білдірмейді. Бұл – жолшылардың нәтижелі жұмысының жемісі.

Теміржол – аса қауіпті аймақ. Жабық қоршаудан, белгіленбеген жерден өте салу, шлагбаум жабық тұрса да асығудың салдары – өміріңмен қош айтысуға алып келуі мүмкін екенін дәлелдеп жатудың қажеті жоқ, оны күнде көріп, біліп отырмыз. Арыс жол дистанциясының, яғни ПЧ-54 басшысы Махмуд Рысбеков 7 ай ішінде бірде-бір адам және мал қағу сияқты келеңсіз фактілердің болмағандығына көңіл демеулі екенін, дегенмен теміржол маңайындағы жергілікті тұрғындарға үгіт-насихат үздіксіз жүргізіліп, басқалай да профилактикалық шаралар жасалып жатқанымен әлі де ереже бұзатындар көп екенін қынжыла жеткізді.

Айталық, қаңтар айында Дарбаза – Сарыағаш өткелі 3 пикеттегі 3330 шақырымдағы жолға қараусыз мал шығып кеткен. Пойыз машинисі дер кезінде тоқтап үлгеріп, малды қағып кетпеген. Ақпан айында ЖылғаДарбаза аралығында, наурызда Сарыағаш-Дарбаза өткеліндегі 7 пикетте, сәуірде Сарыағаш-Дарбаза аралығында мал жайылып жүргені туралы деректер тіркеліп, жолшылар пойыз машинистерінің мал басып кетуінің алдын алған.

«Мұнымен қоса жыл басынан бері Арыс жол дистанциясының мамандары жолға ірі қара малдың шығып кетпеуі үшін 2,3 шақырымдай сыммен қоршау жұмыстарын жүргізді», – дейді Махмуд Рысбеков.

Сондай-ақ, жыл басынан бері 7 ай ішінде жол жүру ережелерін бұзған автокөлік жүргізушілері де аз емес екен. Айталық, наурыз айында екі бірдей автокөлік жүргізушісі пойыз өтетін жолдағы жабық шлагбаумға қарамастан басып өткен. Көк түсті «ГАЗ-53» мемлекеттік нөмірдегі KZ 329 DAR көлігі №2819 жүк пойызының алдындағы жабық шлагбаумнан өтіп кеткен. Екіншісі, 15 наурыз күні сұр түсті мемлекеттік номердегі KZ 110 XFA «КIA» көлігі №2007 жүк пойызының алдындағы жабық шлагбаумды кесіп өткен. Мамыр айында да екі оқиға тіркелген. Бірі мемлекеттік номерлі KZ 724 IZB «Ларгус» көлігі №2817 жүк пойызының алдынан кесіп өтсе, екіншісі, қызыл түсті мемлекеттік номерлі KZ 460 OBB «КАМАЗ» №4302 жүк пойызының өтетініне қарамастан жабық шлагбаумды қағып өткен.

Маусым айында да шлагбаумның жабық тұрғанына қарамастан өрескел ережені бұзған екі оқиға тіркелді. Оның бірі қара түсті лада Калина көлігі № 2839 жүк пойызының жолын кесіп өтуге тырысса, екіншісі №2826 жүк пойызының жабық шлагбаумын кесіп өткен.

Шілде айында да Тойота-Камри көлігі №3001 ірі жүк пойызын кесіп өтсе, екіншісі KZ 848 ХZZ 13 маркалы Тойота № 6938 қаламаңы тасымалы пойызының алдынан жүріп өткен. Міне, ажалына асыққан жүргізушілер қашанғы жолы бола беретінін, бір күні опық жейтіндерін түсінбейтіндері өкінішті...