Кемшілікке кеңшілік болмайды

Жуырда Семей ЖТ бөлімшесі бойынша қыркүйек айының 23 мен қазанның 4 аралығында өткен күзгі комиссиялық байқауды қорытындылауға арналған алқалы жиын болып өтті. Басқосуға желі бойындағы барлық теміржол шаруашылықтары мен еншілес мекемелер басшылары, телімдік ревизорлар, бөлімше басшылары қатысты.

Сараптамалық қорытынды жиында сөз алған бөлімше басшысы Марлен Көкрекбаев күзгі байқаудағы орын алған кемшіліктер мен жетістіктерді қатар сараптап өтті. Нәтиже көрсеткендей, биылғы сынақ барысында желі бойындағы теміржол шаруашылықтарының алдағы қысқа даярлық жұмыстарының біршама жоғары деңгейде екендігі байқалған. Әсіресе, Ақтоғай – Аягөз телімінің бойы тыңғылықты даярланған. Ал өзге телімдер бойынша бірқатар ескертулер бар. Күзгі байқау қарсаңында мекеме басшыларына оған даярлық жасауға белгілі бір уақыт берілген болатын. Дегенмен қауырт жұмыс барысымен әзірлігі нашар мекемелер де анықталған. Олардың қысқа даярлығы алдағы уақытта нақтыланатын болады.

Бөлімше басшысы қандай ескертулер жасалғанына және қандай ақаулықтардың алдын алу бойынша жұмыс жүргізу керектігіне қысқаша тоқталып өтіп, сараптама жасады. Атап айтсақ, күзгі байқау барысында жасалған 338 ескерту ішінде техникалық құжаттамалар толтыру бойынша жіберілген кемшіліктерге баса назар аударылыпты. Сол тәрізді еңбекті қорғау, жұмыс орнын ұйымдастыру, қызметкерлердің біліктілігін шыңдау бойынша да әлі де жетілдіруді қажет ететін жұмыстар қатары анықталған.

Жиын барысында сөз кезегі берілген мекемелер басшылары мен шаруашылық ревизорлары туындаған ахуалға байланысты өз пікірлерін білдірді. Ал, кемшіліктерді жою үшін жекелеген мекемелердің басшыларына қысқа мерзім ішінде уақыт берілді. Егер межелі мерзімде олқылықтар орны толтырылмаса, қатаң шара қабылданатыны туралы ескертілді. Кемшілікке кеңшілік болмайды деді.

Жалпы, табиғаты қатаң Семей аймағы бойынша теміржолшылар қауымының алдағы қысқа даярлығы жоғары деңгейде екендігі, жаз бойғы жүргізілген жұмыстардың нәтижелі екендігі айтылды.